Áskerı qyzmetshiler balalarǵa arnap, kontsert qoıdy
ALMATY. QazAqparat - Almaty qalasyna qarasty Áýezov aýdanynyń qorǵanys isteri jónindegi basqarmasy men Radıoelektronıka jáne baılanys áskerı-ınjenerlik ınstıtýtynyń áskerı qyzmetshileri Halyqaralyq balalardy qorǵaý kúnine oraı aýqymdy merekelik oıyn-saýyq sharasyn uıymdastyrdy, dep habarlaıdy QazAqparat tilshisi.
Family park saıabaǵynda balalar úshin anımatorlardyń qatysýymen kóńildi kontsert usynyldy. Oıyn alańdary, qyzyqty attraktsıondar, kınoteatrlar balalar úshin tegin qyzmet kórsetti. Balaqaılarǵa arnap shyǵarmashylyq baıqaýlar, túrli saıystar men ózge de qyzyqty sharalar uıymdastyrylyp, úzdikter anyqtaldy.
Sonymen qatar, uıymdastyrýshy áskerı qyzmetshiler palatadan qalashyq turǵyzyp, balalar men eresekterge dala jaǵdaıynda daıyndalǵan sarbaz botqasy men palaýdan dám tattyrdy.
- Meniń tórt balam bar, uıymdastyrylǵan dastarhan biz úshin úlken kómek boldy. Uıymdastyrýshy áskerı qyzmetshilerge az qamtylǵan jáne kópbalaly otbasylardyń balalaryn eskerip, arnaıy shaqyrǵandary úshin sheksiz alǵysymdy bildiremin, - dedi kópbalaly ana Álııa Ábisheva.
- Balanyń kúlkisi ár ata-ana úshin eń qymbat syılyq. Osy shattyqqa toly meıramda barlyq balalarǵa qýanysh pen baqyt tileımiz, - dedi uıymdastyrýshy áskerı qyzmetshiler.
Ǵajaıyp sátterge toly merekelik sharadan baldyrǵandar qýanyshty kóńil-kúımen qaıtty.
