Áskerı qyzmetshiler Arys qalasyndaǵy jumystardy jalǵastyrýda

NUR-SULTAN. QazAqparat - Qazaqstan Qarýly Kúshteriniń ınjenerlik-saperler bólimsheleri Arystaǵy qoıma aýmaǵynda tazartý, sondaı-aq jarý jumystaryn jalǵastyrýda, dep habarlaıdy QR Qorǵanys mınıstrliginiń baspasóz qyzmeti.

Baspasóz málimetterine qaraǵanda, apta saıynǵy jumys sapary barysynda Qazaqstan Respýblıkasynyń Qorǵanys mınıstri Nurlan Ermekbaev áskerı qalashyq pen qoıma aýmaǵyn qarap, atqarylǵan jumystyń nátıjeleri jaıynda baıandamalar tyńdap jáne ınjenerlik-saperler bólimsheleriniń jeke quramymen kezdesip júrdi.

Sapardyń qorytyndysy boıynsha naqty tapsyrmalar berdi. Qazirgi tańda Arys qalasynda TJ saldaryn joıý, qoımany basqa jerge aýystyrý, metall synyqtaryn jınaý jáne suryptaý, sondaı-aq Arys garnızondaryndaǵy ákimshilik aýmaqty qalpyna keltirý jáne jóndeý jumystary júrgizildi.

Kúndelikti Qarýly Kúshterde mobıldi jáne ınjenerlik-saperler toby, tıeý-túsirý komandalary, jóndeý-qalpyna keltirý toby, medıtsınalyq personal, veterınarlyq mamandardan quralǵan 1500-den astam áskerı qyzmetshiler jumyldyryldy. Budan basqa, quqyq qorǵaýdy qamtamasyz etý úshin áskerı polıtsııanyń qosymsha jasaǵy, qalanyń 16 sektorynda halyqtyń ótinishterimen jumys atqaratyn jáne tergeý toptary quryldy.

Búgingi kúni áskerı bólimnen tys jerde aýdany 1250 sharshy km. astam aımaq tazartylyp, áskerı súńgýirler 30 shaqyrymnan astam ózen arnasyn tekserip, tazartty. 7 shaqyrym jol jóndelip áskerı qalashyqtaǵy 11 turǵyn úı qalpyna keltirildi. Sondaı-aq bólimniń tehnıkalyq aýmaǵynyń syrtqy qorshaýlary aýystyryldy, qalanyń ákimshilik – sharýashylyq jáne tehnıkalyq aýmaqtarynda elektr qýat kózi jáne sýmen qamtamasyz etý qalpyna keltirildi.

Aıta ketý kerek, barlyq jumystar belgilengen tártip boıynsha qatań qaýipsizdik sharalaryn saqtap júrgizilýde.