Áskerı qyzmetshiler ardagerlerdiń estelikteri negizinde UOS tarıhy jaıly erekshe kitap qurastyrdy (FOTO)
Kitaptyń tusaýkeser saltanaty Semeı qalasyndaǵy Mánshúk Mámetova atyndaǵy qazaqstandyq áskerı qyzmetshilerdiń murajaıynda bolyp ótti. Avtorlar kitapty qurastyrý barysynda Uly Otan soǵysyna qatysqan qazaqstandyqtardyń, Jeńiske jetýdegi halqymyzdyń qosqan úlesin barynsha tolyq ashyp kórsetýge tyrysty. Atalǵan týyndyny jazýda Uly Otan soǵysynyń tarıhy, aty ańyzǵa aınalǵan keńestik áskerı qolbasshylardyń estelik jazbalary, sondaı-aq derekti málimetteri, kórkem fılmder men ádebı shyǵarmalary jete zerdelendi. Kitap avtorlary sol kezeńdegi naqty oqıǵalardy dálme-dál jáne anyq jetkizý úshin Uly Otan soǵysyna qatysqan maıdangerlermen kezdesip, estelik áńgimelerin jazǵan. Kitap qurastyrýshylarynyń sózine súıensek, bul shyǵarma ár oqyrmanǵa Uly Otan soǵysyndaǵy surapyl shaıqastyń erekshe kórinisterin ashyp, Lenıngrad túbindegi keńestik áskerlerdiń eren erligin sýretteıdi, sondaı-aq, Shyǵys-Prýssk, Qyrym, Berlın túbindegi jáne basqa da shabýyl operatsııalary týraly málimetterdi keńinen jetkizedi. UOS dańqty batyrlaryn úlgi-ónegesi elimizdegi jas býyn ókilderin áskerı-otansúıgishtikke tárbıeleýge septigin tıgizedi. «Bizdiń zamannyń batyrlary» kitabynyń tusaýkeser rásimi Uly Otan soǵysyndaǵy Jeńistiń 70 jyldyǵyna orılastyrylyp otyr. Jaqynda Semeıdegi Memlekettik medıtsına ýnıversıtetindegi áskerı kafedranyń áskerı qyzmetshileri de oqyrmandaryn jańa kitaptyń shyǵýymen qýantatyn bolady. Jańa kitap Qazaqstannyń Qarýly Kúshteriniń qurylýyna 25 jyl tolýy qarsańynda shyǵarylady dep josparlanýda.
