Áskerı qyzmetshiler arasyndaǵy kópsaıystan chempıonat jeńimpazdary anyqtaldy

ASTANA. QazAqparat - Armııa ortalyq sport klýbynyń bazasynda Qorǵanys mınıstrligi Ortalyq Apparaty men Qazaqstan Respýblıkasy Qarýly Kúshteri Bas shtabynyń VII Spartakıada baǵdarlamasy aıasynda áskerı-sport keshenindegi kópkúres chempıonaty aıaqtaldy, dep habarlaıdy «QazAqparat» HAA vedomstvonyń baspasóz qyzmetine silteme jasap.

Chempıonatqa 70-ten astam áskerı qyzmetshi qatysty. Úsh kezeńnen quralǵan saıystarda erler beltemirge (týrnık) tartylýdan, áıelder keshendi kúshtik jattyǵýlardan kúsh synasty, sondaı-aq kross jarysy uıymdastyryldy.

Týrnır qorytyndysy boıynsha, Qorǵanys mınıstrligi men Bas shtabtyń qurylymdyq bólimsheleri arasynda jalpykomandalyq esepte kadrlar jáne áskerı bilim berý departamentiniń komandasy birinshi oryndy jeńip aldy. Metrologııalyq qamsyzdandyrý jáne standarttaý ortalyǵynyń áskerı qyzmetshileri ekinshi oryndy ıelense, úzdikter úshtigin serjanttar quramymen jumys basqarmasynyń komandasy tuıyqtady.

Bas basqarmalar arasynda birinshi oryn tyl bastyǵy jáne qarýlandyrý basqarmasyna buıyrdy, rejım jáne qaýipsizdikti qamtamasyz etý áskerı polıtsııasy jasaǵynyń áskerı qyzmetshileri (QR Qorǵanys mınıstrligi) ekinshi, áskerı polıtsııa bas basqarmasynyń komandasy úshinshi orynǵa turaqtady.

«Áskerı sportshylardyń dene (fızıkalyq) daıyndyǵy - armııanyń jaýyngerlik qabiletiniń kepili. Búgingi tańda fızıkalyq daıyndyq áskerı daıyndyqtyń quramdas bóligi bolyp tabylady. Sondyqtan biz buǵan erekshe nazar aýdaramyz, jattyǵýlardy, jappaı sport sharalaryn sapaly uıymdastyryp, sport nysandarynyń áskerı qyzmetshilerge qoljetimdiligin qamtamasyz etip kelemiz», - deıdi sport komıtetiniń tóraǵasy - armııa ortalyq sport klýbynyń bastyǵy polkovnık Rasýl Meıirmanov.