Áskerı qyzmetshi úsh myń shaqyrymdy velosıpedpen júrip ótpek
Qorǵanys mınıstrliginiń málimetinshe, ol bul marafonyn tól áskerimizdiń 30 jyldyǵyna arnap otyr.
Oljas 24 sáýirde ózi qyzmet etetin Atyraý garnızonynan jolǵa shyqqan bolatyn. Jolaı Oral, Aqtóbe, Yrǵyz, Aral, Qyzylorda, Túrkistan, Shymkent qalalaryn basyp ótti. Taraz qalasynda maıor Oljas Toıshybaevty «Ońtústik» óńirlik qolbasshylyǵynyń áskerı qyzmetshileri qarsy alyp, qurmet kórsetti.
«Dene daıyndyǵymen úzdiksiz aınalysatyn áskerı adam bolǵandyqtan, óz múmkindigimdi fızıkalyq jáne moraldy turǵydan synap kórgim keldi. Kez kelgen sportshy úshin jańa deńgeıdi baǵyndyrý – rýhyńdy nyǵaıtý bolyp esepteledi», - dedi áskerı marafonshy.
Oljas jolda 10 keli salmaq tastapty. Áıtse de kóptegen jańa tanystar taýyp, keremet áserler alǵanyn aıtady. Jolaı tarıhı oryndarǵa at basyn buryp, kórikti jerlermen tanysýǵa múmkindik alǵan.
Velosherýdiń sońǵy núktesi – Almaty. Bul qala – Oljastyń týyp-ósken jeri. Onda veloshabandozdy týystary men jaqyndary, sondaı-aq ózi birneshe jyl áskerı qyzmet atqarǵan Desanttyq-shabýyldaý áskerlerindegi dostary kútip otyr.
