Áskerı qyzmetshi: Tatýlyq, birlik – bizdiń basty baılyǵymyz
ORAL. QazAqparat – Tatýlyq, birlik – bizdiń basty baılyǵymyz. Qazaqstan halqynyń birligi kúnine oraı QR Ulttyq ulany «Batys» óńirlik qolbasshylyǵyna qarasty 5517-áskerı bóliminiń tárbıe jáne áleýmettik-quqyqtyq jumys bóliminiń aǵa ofıtseri, maıor Roman Abdrahmanov oı-tolǵamyn osylaı bildirdi, dep habarlaıdy QazAqparat tilshisi.
Onyń aıtýynsha, ulty – tatar, ózin Qazaq eliniń patrıoty dep esepteıdi.
«Sebebi bizdiń ortaq úıimiz – bıyl táýelsizdik alǵanyna 30 jyl tolatyn Qazaqstan. Elimizdegi qol jetken barsha tolaǵaı tabys osy halyqtar dostyǵymen tyǵyz baılanysty. Sheteldikter bizdi aýyzbirshiligi mol, yntymaǵy jarasqan el dep biledi. Bul, rasynda da, solaı. Osy birliktiń arqasynda elimiz damyp keledi. Osy tatýlyqtyń arqasynda Qazaqstan kúlli álem qyzyǵa qaraıtyn dáýletti de sáýletti memleketke aınaldy», - deıdi Roman.
Sózine qaraǵanda, osydan on jyl buryn qazaq qyzy Álııaǵa úılenip, otbasyn qurǵan eken. Ol da áskerı qyzmetshi. Oǵan qosa eki balanyń tárbıesimen aınalysady. Otbasynda tatar jáne qazaq halqynyń salt-dástúri men ádet-ǵurpy qatar saqtalady.
«Áskerde qyzmet etken 15 jyldan astam ýaqyt ishinde ár túrli laýazymdarda qyzmet atqardym jáne kez kelgen ujymda jaqsy qarym-qatynas, ózara qoldaý men qurmet, ádeptilik bolǵanyn atap ótkim keledi. Ulttyq ulannyń «Batys» óńirlik qolbasshylyǵynyń áskerı bólimderinde 15 ult ókili Otan aldyndaǵy boryshtaryn abyroımen atqaryp júr eken. Solardyń qatarynda keıingi jastarǵa úlgi bolyp, elimizdiń qorǵanysy odan saıyn nyǵaıyp, damýyna laıyqty úles qosa bilsek, odan úlken arman joq. Árdaıym uıymshyl da tártibi men birligi bekem áskerı ujymymyzben maqtana berýge jazsyn. Eń bastysy, elimizde beıbitshilik pen kelisim saltanat qura bersin!» dedi Roman Abdrahmanov.
