Áskerı qyzmetshi Qaraǵandydan Jańaarqaǵa eki kúnde júgirip jetpek

NUR-SULTAN. QazAqparat – Áskerı polıtsııanyń áskerı qyzmetshisi – aǵa leıtenant Zańǵar Álkenov Qazaqstanda alǵash ret ýltramarafon bastap otyr. Ol «Qaraǵandy – Jańaarqa» baǵytyn, ıaǵnı 200 shaqyrymdy 48 saǵatta baǵyndyrmaq, dep habarlaıdy QazAqparat.

QR Qorǵanys mınıstrliginen málim etkendeı, Z.Álkenov marafondy búgin, 2 qyrkúıek kúni saǵat 7.00-de Qaraǵandy qalasyndaǵy áskerı polıtsııa bóliminiń baqylaý-ótkizý pýnktinen bastady. Jospar boıynsha ony 4 qyrkúıekte týǵan ólkesi Jańaarqa aýdanynda kútip alady.

Ofıtser marafon júgirisin Qaraǵandy garnızonyndaǵy áskerı polıtsııa bóliminiń qurylǵanyna 23 jyl tolýyna arnap otyr.

Zańǵar Álkenov qazaq kúresinen QR sport sheberi jáne dzıýdo men sambodan sport sheberine úmitker. Buǵan deıin elimizdiń qurama komandasynda bolǵan. Biraq alǵan jaraqaty men operatsııadan keıin kúrestegi kásibı mansabyn aıaqtap, besinshi jyl qatarynan Armııa ortalyq sport klýbynyń sportshylaryn jattyqtyrýda. Birneshe jyldan beri kóp shaqyrymdyq marafondarǵa qatysyp keledi. Onyń eń uzyn qashyqtyǵy 130 shaqyrymdy quraǵan.

«200 shaqyrymdyq marafon arqyly óz múmkindikterimdi tózimdilikke tekseretin bolamyn», – deıdi áskerı qyzmetshi.

«Júgiris navıgatsııalyq platformamen baqylanyp turady. Onlaın rejıminde júgirýshiniń baǵyty men ýaqytyn baqylaýǵa bolady», - dedi mınıstrlikten.