Áskerı qyzmetshi bolsaq ta, áıel-ana ekenimizdi umytpaımyz – Ásem Qazenova
ORAL. QazAqparat – Otan qorǵaý negizinen er adamdardyń boryshy bolǵanmen, qazaq áskeriniń 10 paıyzdan astamy - áıelder. Solardyń biri – QR Ulttyq ulany «Batys» óńirlik qolbasshylyǵynyń qyzmetkeri, serjant Ásem Qazenova, dep habarlaıdy QazAqparat tilshisi.
Áıel qyzmetshilerdiń kópshiligi shtabta qyzmet atqarady. Á.Qazenova da shtabty uıymdastyrý-jumyldyrý jáne jasaqtaý bóliminiń aǵa mamany retinde óz isin adal atqaryp keledi.
Soltústik Qazaqstan oblysynda dúnıege kelgen Ásemniń ákesi Qaırolla men anasy Sábıra Qazıevter – elge eńbegi sińgen ardaqty ustazdar.
-Áskerı qyzmetshi bolǵanymyzben, bizder áıel bolyp qalamyz. Degenmen bosańsýǵa tıisti emespiz. Erlermen ıyq tirestire otyryp, óz mindetimizdi abyroımen atqarýymyz kerek. Eger azamattarymyz aldyńǵy shepte júrse, biz tylda myqty bolýymyz qajet, - deıdi Ásem Qaırollaqyzy.
Ásem Qazenova qyzmeti qansha qaýyrt bolǵanymen, otbasylyq mindetin de umytpaıdy. Ol – aıaýly jar, úsh balanyń anasy.
-Meniń jubaıym, podpolkovnık Hamıt Qazenov ofıtser bolǵandyqtan, mekenjaıymyzdy jıi ózgertýge týra keldi. Mamandyǵyma baılanysty da jumys istedim. Degenmen 2003 jyly áskerı qyzmetke aýystym, - deıdi Ásem.
Hamıt Qazenov – Aqtóbeniń týmasy. Petropavlda Іshki áskerler joǵary áskerı ýchılışesinde bitirgen sátte Ásem M.Jumabaev atyndaǵy gýmanıtarlyq kolledjde shet tili mamandyǵyna oqyp júrgen-di. Keıin 2009 jyly E.Býketov atyndaǵy Qaraǵandy memlekettik ýnıversıtetin aıaqtap shyqty.
Ekeýi otaý qurǵan soń, jas leıtenantty birden Atyraýǵa jiberedi. Búginde olar altyn asyqtaı úsh bala tárbıelep otyr. Úlkeni Aıdana 15-te, Ańsar 10-da, Myrzahan 4-te, balabaqshaǵa baryp júr.
-Árdaıym meni qoldap-qorǵaıtyn erim, qýantatyn balalarym bar, odan artyq qandaı baqyt kerek! Otbasymyzben bos ýaqytymyzdy kóńildi ótkizýge tyrysamyz. Sóz sońynda 8 naýryz – Halyqaralyq áıelder kúnimen barsha áriptesterimdi shyn júrekten quttyqtap, baqyt, jaqsylyqtyń bárin tileımin, - dedi Ásem Qazenova.
