Áskerı qyzmetkerler maıdanger jazýshy Ábdijámil Nurpeıisovty Jeńis kúnimen quttyqtady

ALMATY. QazAqparat - Almaty garnızonynyń áskerı qyzmetshileri ardagerlerdi Jeńistiń 75 jyldyǵymen quttyqtady, dep habarlaıdy QazAqparat tilshisi. Almaty qalasy qorǵanys isteri jónindegi departamentiniń baspasóz qyzmetine silteme jasap.

«Soǵys ardagerleri azaıyp barady. Búgin de olardyń eń jasy toqsanda. Bizge beıbit ómir syılaǵan batyrlardyń erligi keıingi urpaqtyń jadynda máńgi saqtalady», - dep atap ótti departamenttiń baspasóz qyzmeti.

Ábdijámil Nurpeıisov Aral teńiziniń jaǵasyndaǵy shaǵyn balyqshylar aýylynda dúnıege kelgen. Osy jerden áskerge shaqyrylyp, maıdan dalasyna attandy. Ońtústik jáne Prıbaltıka maıdanynda, Lýgansk túbinde mınomet rotasynda saıası qyzmetker, keıin shtabıst retinde Baltyq mańynda Kýrlıandııa platsdarmyndaǵy shaıqastarǵa qatysqan.

Keıinirek ol óziniń eńbekterinde Baltyq aýmaǵyn fashısterden azat etken jaýyngerler men ofıtserlerdiń erligi týraly jazdy.

Jazýshynyń eren eńbegi eldiń, memlekettiń joǵary baǵasyna ıe boldy. «Eńbek Qyzyl Tý», «Qurmet belgisi», Qazaqstan memleketiniń «Otan» ordenimen marapattalǵan.

Maıdanger – jazýshyǵa degen qurmet qashanda erekshe. Almaty garnızonynyń áskerı qyzmetkerleri jazýshynyń úıine jıi qonaqqa kelip turady. Jeńistiń 75 jyldyq merekesine oraı ardagerge qorǵanys mınıstri general-leıtenant Nurlan Ermekbaevtyń atynan alǵys hat pen qol saǵat tapsyryldy.

Almaty qalasy QR QK ardagerler keńesiniń ókili polkovnık Mels Shampıev, Desanttyq-shabýyldaý áskerleri qolbasshysynyń orynbasary polkovnık Radjan Janysov, Almaty qalasynyń Qorǵanys isteri jónindegi departamentiniń bastyǵy, polkovnık Amantaı Óserbaev megopolıste turatyn basqada soǵys ardagerlerdiń úılerine baryp qurmet kórsetti. Atap aıtar bolsaq, Leonıd Gırsh , ıÝrıı Pomerantsev, Oljabaı Temırhanov.

Esterińizge sala keteıik, búginde Almatyda 200-ge jýyq soǵys ardageri turady.