Áskerı qyzmetker bolǵysy keletin jastar kóbeıip keledi - general-maıor T.Qoıbaqov
- Ózińiz basqaratyn «Ońtústik» óńirlik qolbasshylyǵy áskerleriniń jaýyngerlik daıyndyǵyn qalaı baǵalar edińiz?
- Búginde «Ońtústik» óńirlik qolbasshylyǵynyń áskerleri - bul elimizdiń Ońtústik aımaǵynyń áskerı qaýipsizdigin senimdi qamtamasyz etetin jaýyngerlik jaǵynan jattyqan jáne qalyptasqan organ bolyp tabylady. Jýyrda aıaqtalǵan Qorǵanys mınıstrliginiń Bas ınspektsııasy bizdiń áskerlerdiń tekserý qortyndysy boıynsha quramalar men áskerı bólimder synaqty tabysty tapsyryp jáne qoıylǵan tapsyrmalardy oryndaı alatyndyqtaryn dáleldedi. «Ońtústik» óńirlik qolbasshylyǵynyń áskerı qyzmetshileri Otan qorǵaýshylar kúni jáne Uly Otan soǵysynyń jeńisine 69 - jyl tolýy memlekettik meıramy qarsańynda «Kásibı maman - Armııa negizi» atty uranmen ótkizilgen jaýyngerlik saıystyń birinshi kezeńin aıaqtady. Mamyr aıynyń merekesi qarsańynda podpolkovnık K.Ú.Úshtaev basqaratyn 85395 áskerı bólimi jáne polkovnık A.K.Qalıjanov basqaratyn 28903 áskerı bóliminiń ujymdary jaýyngerlik jáne memlekettik-quqyqtyq daıyndyqta jaqsy jetistikterge qol jetkizdi.
- Jastar arasynda áskerı qyzmettiń bedeli men abyroıyn arttyrýda qandaı jaǵdaı jasalýda?
- Búginde bizdiń memleketimizdiń basshylyǵy táýelsiz Qazaqstan armııasy kúshti jáne myqty bolyp qalyptasýy, sondaı-aq áskerı kásibı bedeldi jáne abyroıly bolýy úshin barlyq jaǵdaılardy jasaýda. Jyl basynan beri «Ońtústik» óńirlik qolbasshylyǵynyń áskerlerinde jaýyngerlik daıyndyqpen qatar ásker qataryna shaqyrylýshy jastarmen kóptegen áskerı-patrıottyq aktsııalar ótkizildi. Qýantarlyq jaıt, búgingi zamannyń oqýshylary qatarynda bolashaqta óz ómirlerin áskerı qyzmetpen baılanystyrǵysy keletinderdiń qatary ósip keledi. Armııada patrıottar kóp bolǵan saıyn bizdiń Qazaqstanymyzdyń kúshi arta túsedi. Ári áskerılerdiń áleýmettik jaǵdaılary da jaqsaryp, olardy baspanamen qamtý jolǵa qoıylýda.
- Mereke qarsańyda «Ońtústik» óńirlik qolbasshylyǵynda qandaı sharalar ótkiziledi?
- 7 mamyr kúni Astanada ótetin áskerı sherýge bizdiń áskerlerimiz qatysady. Onda «Ońtústik» óńirlik qolbasshylyǵynyń áskerleriniń úzdik ofıtserleri, serjanttary jáne áskerı áıel qyzmetshileri Qurlyq áskerleriniń sherýinde sap túzeıdi. Al, 9 mamyrda Otan qorǵaýshylar kúni jáne Uly Otan soǵysynyń jeńisi meıramyn Taraz garnızonynda Jambyl oblysy ákimdigimen birge bizdiń áskerı qyzmetshiler qatysqan merekelik sharalar ótedi. Bul sharalar bizdiń Qarýly Kúshterimizdiń abyroıyn arttyrýǵa jáne áskerlerdiń zamanaýı kásibı sheberligin turǵyndarǵa shynaıy kórsetý múmkindigi týady. Meıram kúnderi biz Uly Otan soǵysynyń ardagerlerin umytpaýymyz tıis. Olar ózderiniń jastaryna qaramastan sarbazdar men áskerı qyzmetshilerdi batyrlyqqa jáne Otanymyzǵa abyroımen qyzmet etýge úıretedi. Taraz garnızonynyń bir áskerı bóliminiń qadirli qonaǵy Uly Otan soǵysynyń ardageri Ahmetov Nyǵmet aqsaqal buǵan jarqyn úlgi bola alady. Ardagerlerden biz ómirdi baǵalaýdy jáne jaýyngerlik tájirıbesin úırenemiz, olardyń osy ataýly kúni barlyǵyna densaýlyq, uzaq ǵumyr tileımiz. - Áńgimeńige rahmet!