«Áskerı qurylystyń» barlyq qaryzy jyl sońyna deıin jabylady

Qorǵanys mınıstriniń orynbasary Sultan Qamaletdınov «Áskerı qurylys» kásiporny qaryzyna qatysty túsinik berdi, dep habarlaıdy QazAqparat tilshisi.

«Bul másele birneshe jyldan beri kóterilip keledi. Áskerı qurylys» boıynsha 2021 jyldan beri tekseris júrip jatyr. Qylmystyq is qozǵaldy. Atap aıtqanda, Qorǵanys mınıstrligi men «Áskerı qurylystyń» jańadan taǵaıyndalǵan basshylyǵy qalyptasqan qaryzdy óteý boıynsha tıisti jumystardy atqaryp jatyr. Jyl sońyna deıin barlyq qaryz óteledi», - dedi S. Qamaletdınov Senattyń jalpy otyrysynan keıin tilshiler suraǵyna jaýap bere otyryp.

Budan buryn habarlanǵandaı, bıyl jazda Sybaılas jemqorlyqqa qarsy qyzmet «Áskerı qurylys» AQ burynǵy prezıdenti E. Tájıdenovtiń jáne basqalardyń basshylyǵymen uıymdasqan qylmystyq topqa qatysty tergeýdi aıaqtady.

11 adam qylmystyq jaýapkershilikke tartyldy. Olar taýarlar men qyzmetterdi satyp alýǵa, óteýsiz qarjylyq kómek kórsetýge úlestes kompanııalarmen jalǵan shart jasasý arqyly asa iri kólemde bıýdjet qarajatyn jymqyrdy dep kúdikke ilindi. Zalaldyń jalpy somasy - 596 mln teńge.