Áskerı qurylys AQ-nan qarjy jymqyrý áreketi boıynsha qylmystyq is tergelip jatyr
NUR-SULTAN. QazAqparat - QR Sybaılas jemqorlyqqa qarsy is-qımyl agenttigi «Áskerı qurylys» aktsıonerlik qoǵamynan qarjy jymqyrý áreketi boıynsha qylmystyq isti tergep jatyr. Bul týraly QazAqparat QR Qorǵanys mınıstrliginiń baspasóz qyzmetine silteme jasap habarlaıdy.
Baspasóz málimetterine qaraǵanda, Qazaqstannyń Qorǵanys mınıstrligi jalǵyz aktsıoner retinde enshiles uıymy «Áskerı qurylys Astana» JShS bolyp tabylatyn «Áskerı qurylys» AQ-nyń basshylyǵyn aýystyrǵan.
Qorǵanys vedomstvosynyń basshylyǵy kompanııalar ókilderimen birneshe ret kezdesýler ótkizdi. Olardyń barysynda kredıtorlyq bereshekti óteýge qatysty problemalyq máseleler jáne olardy sheshý joldary, sondaı-aq Qoǵamdy ońaltý rásimderi boıynsha kelissózder talqylandy.
« Qorǵanys mınıstrligi «Áskerı qurylys Astana» JShS aldyndaǵy barlyq mindettemelerin tolyq oryndady. Atqarylǵan qyzmetter úshin barlyq aqshalaı qarajat ýaqtyly aýdaryldy. Sonymen qatar mınıstrlik derbes sharýashylyq júrgizýshi sýbektilerdiń ózara qarym-qatynasy úshin zań turǵysynda jaýap bermeıdi. Alaıda, osy máseleniń áleýmettik sıpatyn eskere otyryp, Qorǵanys mınıstrligi óz bastamasy boıynsha basynan bastap jaǵdaıdy óziniń zańdy quzyreti sheńberinde retteýge belsendi túrde qatysady»,-delingen habarlamada.
