Áskerı kýrsanttar jaýyngerlik mashınany sý ishinde basqarýdy úırenýde

ASTANA. QazAqparat - Bolashaq ofıtserler sýdaǵy bógetterdi jaýyngerlik mashınalarmen buzyp ótý boıynsha jattyǵýlar ótkizýde, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Qurlyq áskerleri Áskerı ınstıtýtynyń 4-kýrs kýrsanttary jaýyngerlik mashınalardy sý ishinde basqarý boıynsha oqý-jattyǵýlaryn pysyqtaýda.

Atap ótilgendeı, praktıkalyq tapsyrmany oryndaýǵa kýrsanttar qajetti aıla-tásilderdi meńgerip, zerdelegennen keıin ǵana jiberiledi. Oqytýshylardyń jetekshilik etýimen bolashaq ofıtserler sý jaǵasynyń ártúrli bıiktiginde sýǵa kirý jáne shyǵý, berilgen orynda mashınany tejeý jáne toqtatý, kedergisi bar joldarda  manevrleý boıynsha jattyǵýlardy pysyqtaıdy.
  

«Sońǵy kýrs kýrsanttary Jánibek Azanbaı men Almabek Berdibek sý betinde jaýyngerlik mashınalardy alǵashqylardyń biri bolyp tizgindedi. Jaýyngerlik mashınalar bolashaq ofıtserlerdiń tájirıbeli qoldaryna birden baǵyndy. Brondalǵan mashınany qurlyqta basqarý boıynsha kópsaǵattyq jattyǵýlar bozbalalarǵa jattyǵýdy «úzdik» degen baǵaǵa oryndaýǵa múmkindik berdi», - dedi materıaldyq-tehnıkalyq qamtamasyz etý kafedrasynyń aǵa oqytýshysy polkovnık Nurbolat Nyǵmetov.