Áskerı kýrsanttar arasynda matematıkadan halyqaralyq olımpıada ótip jatyr
Baspaóz málimetterine qaraǵanda sharaǵa Qazaqstan, Reseı, Belarýs, Qyrǵyzstan, Ózbekstan, Armenııa jáne Tájikstan Respýblıkasynan kelgen 7 komanda baq synaýda.
Atalǵan aýqymdy sharaǵa TMD-ǵa qatysýshy memleketterden kelgen komandalardyń jetekshileri jáne Qazaqstan Respýblıkasy Ulttyq ǵylym akademııasynyń beıindik ǵylymı-zertteý ınstıtýttarynyń qyzmetkerleri men azamattyq joǵary oqý oryndarynyń professorlyq-oqytýshylar quramynyń matematıka salasyndaǵy asa tájirıbeli mamandary qazylyq etýde.
TMD qatysýshy memleketteriniń Qorǵanys mınıstrleri keńesiniń tóraǵasy - Reseı Federatsııasynyń Qorǵanys mınıstri armııa generaly S.Shoıgý men Qazaqstan Respýblıkasynyń Qorǵanys mınıstri general-maıor N.Ermekbaevtyń tikeleı jetekshiligimen áskerı-oqý oryndaryndaǵy ofıtserlik quramnyń sapaly daıyndyǵyna úlken kóńil bólinip keledi.
«Mundaı sharalar halyqaralyq senimdi arttyryp, dostyq qatynasty nyǵaıtýǵa jáne TMD qatysýshy memleketterdiń áskerı joǵary oqý oryndarynyń ǵylym-bilim berý salasyndaǵy tájirıbe almasýyna zor múmkindik beredi, - dedi olımpıadanyń ashylý saltanatynda sóz alǵan QR Qorǵanys mınıstrliginiń Kadrlar jáne áskerı bilim departamentiniń bastyǵy general-maıor Rashıd Kópbaev.
Olımpıada tórt kezeńnen turady. Aldyńǵy eki týrdyń qorytyndysy boıynsha Radıoelektronıka jáne baılanys áskerı-ınjenerlik ınstıtýty (Almaty q.) kýrsanttarynyń komandasy kósh bastap keledi. Ekinshi orynda - Reseı Federatsııasy, Ózbekstan Respýblıkasynyń kýrsanttary úshinshi orynda keledi. Olımpıadanyń jabylý saltanaty ústimizdegi jyldyń 25 sáýirinde Qaraǵandy Memlekettik ýnıversıtetinde ótedi.
TMD-ǵa qatysýshy memleketterdiń joǵary áskerı bilim berý uıymdary kýrsanttary arasyndaǵy matematıka páni boıynsha halyqaralyq olımpıada 2014 jyldan beri turaqty túrde ótkizilip keledi.
