Áskerı komıssarıat anyqtamalary elektrondy formatqa kóshirilmek

ASTANA. QazAqparat - Jergilikti áskerı basqarý organdary anyqtamalardy elektrondy formatta beretin bolady. Bul týraly búgin Ortalyq kommýnıkatsııalar qyzmetinde ótken brıfıngte Bas shtab basshysynyń orynbasary, general-maıor Muhamedjan Talasov málim etti, dep habarlaıdy QazAqparat.

«Aqparat jáne kommýnıkatsııa mınıstrligimen birge «Tsıfrly Ásker» baǵdarlamasy aıasynda tsıfrly tehnologııalar negizinde jergilikti áskerı basqarý organdarynda azamattarǵa avtomattandyrylǵan qyzmet kórsetý boıynsha jumystar jasalýda», - dedi Talasov.

Onyń aıtýynsha, qazirgi ýaqytta memlekettik qyzmetterdi elektrondy formatqa aýystyrý jaıy pysyqtalyp jatyr. Atap aıtqanda, áskerı boryshyn ótegendigi týraly anyqtama, jeńildikter alatyn tulǵalarǵa - Uly Otan soǵysynyń ardagerlerine, Chernobyl AES-degi apattyń saldarlaryn joıýǵa qatysqan azamattarǵa, Aýǵan ardagerlerine anyqtama berý jumystary tolyǵymen avtomattandyrylatyn bolady.

M. Talasovtyń habarlaýynsha, bolashaqta barlyq qorǵanys isi jónindegi departamentter, basqarmalar men bólimsheler qoǵamdyq qabyldaý sııaqty jumys jasaıdy. Onda árbir azamattyń qajetti aqparatty jedel alýǵa múmkindigi týady.