Áskerı kolledjdi úzdik aıaqtaǵandar joǵary áskerı oqý oryndaryna birden ekinshi kýrsqa qabyldanady

ASTANA. KAZINFORM – Astana qalasy Áskerı kolledjiniń bastyǵy, polkovnık Ǵazız Túleýshev bıylǵy oqýǵa qabyldaý tártibi men úzdik túlekterge qandaı múmkindikter beriletinin túsindirdi.

«Astana qalasyndaǵy Áskerı kolledjge oqýǵa 15 jasqa tolǵan, biraq 17 jastan aspaǵan, 9-synypty aıaqtaǵan jasóspirimder qabyldanady. Oqý merzimi 2 jyl 10 aıdy quraıdy. Kásipqoı serjanttardy daıarlaý QR Qarýly Kúshteri úshin talap etiletin úsh mamandyq, tórt biliktilik boıynsha júzege asyrylady. Atap aıtqanda, baılanys, radıoelektronıka jáne kommýnıkatsııa quraldarynyń tehnıgi, qarý-jaraq pen áskerı tehnıkany paıdalaný jáne jóndeý jónindegi tehnıgi, ınjenerlik-saperlik bólimshelerdi basqarý, radıatsııalyq, hımııalyq jáne bıologııalyq qorǵanys áskerleriniń bólimshelerin basqarý mamandyqtary boıynsha», - dedi spıker Ortalyq kommýnıkatsııalar qyzmetinde ótken baspasóz máslıhatynda.

Oqýdy bitirgen azamattar «kishi serjant» áskerı ataǵyn, sonymen birge «V» jáne «S1» sanatyndaǵy júrgizýshilerdi daıarlaý kýrstaryn aıaqtaǵany týraly kýálik alady jáne áskerı bólimderge 100% jumysqa ornalasady.

«Áskerı kolledjde oqýdy úzdik aıaqtaǵan azamattar joǵary áskerı oqý oryndaryna birden ekinshi kýrsqa túsýge quqyly jáne qysqartylǵan oqý baǵdarlamasy boıynsha oqýyn jalǵastyrady. Kolledjden keıin áskerı ınstıtýttarǵa túsetin azamattar kolledjde ótkiziletin reıtıngtik irikteý nátıjeleri boıynsha UBT tapsyrmaı qabyldanady», - dep túsindirdi kolledj bastyǵy.

Sondaı-aq, bıyl Şýchınsk qalasyndaǵy áskerı kolledjge 9 jáne 11 synyptardy bitirgenderdi qabyldaý júrgiziledi. Buryn qabyldaý tek 11 synyptan keıin júrgizilgen. Oǵan 280 adamdy oqýǵa qabyldaý josparlanyp otyr. 

Buǵan deıin spıker Qazaqstandaǵy áskerı oqý oryndaryna qujat qabyldaý merzimi uzartylǵany habarlanǵan edi.