Áskerı kolledj túlekteri UBT-syz áskerı ınstıtýtqa túse alady
ASTANA. KAZINFORM – Áskerı kolledj túlekteri Ulttyq biryńǵaı testileýdi tapsyrmaı-aq áskerı ınstıtýttarda bilimin jalǵastyra alady. Bul týraly OKQ-de ótken baspasóz máslıhatynda QR Qorǵanys mınıstrligi Áskerı bilim jáne ǵylym departamentiniń bastyǵy, polkovnık Murat Oljabaev aıtty.
Onyń sózinshe, búginde Qorǵanys mınıstrligi bolashaq áskerı qyzmetshilerdi erte kezeńnen daıarlaýǵa basymdyq berip otyr. Osy maqsatta elimizdegi bes áskerı kolledjge 9 nemese 11-synyptan keıin oqýǵa túsýge múmkindik bar.
– Kolledjde oqý barysynda kýrsanttar memleket tarapynan tolyq qamtamasyz etiledi. Olar áskerı ant qabyldap, áskerı qyzmet ótkerý týraly kelisimshartqa qol qoıady. Oqýdy aıaqtaǵan soń túlekterge serjant áskerı ataǵy men memlekettik úlgidegi dıplom beriledi. Oqýdy aıaqtaǵan túlekter Qarýly kúshter qatarynda áskerı qyzmetke jiberiledi, - dedi ol.
Departament basshysynyń sózinshe, áskerı kolledj túlekteri oqýyn áskerı ınstıtýttarda qysqartylǵan úsh jyldyq baǵdarlama boıynsha jalǵastyra alady. Bul úshin UBT tapsyrý talap etilmeıdi.
– Osylaısha serjanttan ofıtserge deıingi áskerı mansapty kezeń-kezeńimen qalyptastyrýǵa múmkindik jasalyp otyr, – dedi Murat Oljabaev.
Eske salaıyq, áskerı joǵary oqý oryndary men kolledjderge qujat qabyldaý 31 shildege deıin jalǵasady
