Áskerı kolledj 30 jylda 4 myńǵa jýyq serjant daıarlady
ASTANA. KAZINFORM — Şýchınsk qalasynda Qazaqstan Respýblıkasy Qorǵanys mınıstrliginiń Shoqan Ýálıhanov atyndaǵy áskerı kolledjiniń qurylǵanyna 30 jyl tolýyna arnalǵan saltanatty is-shara ótti. Bul týraly Qorǵanys mınıstrligi málim etti.
Jıynǵa Qorǵanys mınıstriniń orynbasary Ásker Beısenov, Aqmola oblysy Býrabaı aýdanynyń ákimi Araı Sadyqov, Qorǵanys mınıstrligi Áskerı bilim jáne ǵylym departamentiniń bastyǵy polkovnık Murat Oljabaev, Qarýly kúshterdiń bas serjanty sheber-serjant Temirbek Halyqov, ardagerler, kolledj túlekteri men jeke quramy qatysty.
Saltanatty shara Shoqan Ýálıhanovtyń bıýstine Qurmet qaraýylynyń súıemeldeýimen gúl shoqtaryn qoıý rásiminen bastaldy. Kolledjdiń oqý-jattyǵý alańynda birinshi kýrs kadetteri Áskerı ant qabyldap, kedergiler jolaǵynda dene daıyndyǵy men áskerı mashyǵyn kórsetti.
Qurmetti qonaqtar kolledjde qyzmet etken jyldarynan estelikterimen bólisti. Qarýly kúshterdiń ardageri general-maıor Jomart Qýanǵalıev oqý ornynyń qurylýy men qalyptasýynyń bastaýynda turyp, onyń alǵashqy bastyǵy boldy. Qorǵanys mınıstriniń orynbasary Ásker Beısenov áskerı oqý ornyn aıaqtaǵannan keıin leıtenant sheninde ofıtserlik qyzmet jolyn osy jerde bastady. Al Qarýly kúshterdiń bas serjanty sheber-serjant Temirbek Halyqov kolledjde kadet boldy.
— Otyz jyl — kolledj tarıhyndaǵy mańyzdy kezeń. Osy jyldar ishinde oqý orny áskerı bilim berý júıesiniń mańyzdy býynyna aınalyp, myńdaǵan bilikti serjant mamandaryn daıarlady. Búginde kolledj túlekteri áskerı bólimderde abyroımen qyzmet etip, jaýapty laýazymdarda eńbek etip, Qarýly kúshterdiń jaýyngerlik ázirligin arttyrýǵa úles qosyp keledi, — dedi Qorǵanys mınıstriniń orynbasary Ásker Beısenov.
Іs-shara barysynda Shoqan Ýálıhanovtyń murasy men ǵylymı-zertteý qyzmetine arnalǵan fotokórme uıymdastyryldy. Sondaı-aq áskerı tehnıka, qarý-jaraq, baılanys jáne radıatsııalyq, hımııalyq jáne bıologııalyq qorǵaý quraldary kórsetildi. Qonaqtar kazarma, medıtsınalyq pýnkt, sport zaly, kitaphana, FPV-drondar synyby ornalasqan zerthanalyq korpýs pen kolledj murajaıyn aralady.
Shoqan Ýálıhanov atyndaǵy áskerı kolledj Qazaqstan Respýblıkasy Prezıdentiniń Jarlyǵymen 1996 jyly qurylǵan. Alǵashqy 63 kásibı serjanttyń oqý bitirý rásimi 1999 jylǵy 29 shildede ótti. Sol jyly kolledjge Jaýyngerlik Tý tabystalyp, 2000 jyly oqý ornyna Shoqan Ýálıhanovtyń esimi berildi.
1996-2025 jyldar aralyǵynda kolledjde 4 myńǵa jýyq kásibı serjant daıarlandy. Búginde munda áskerı-kásibı jáne dene daıarlyǵymen qatar kýrsanttardyń kóshbasshylyq, jaýapkershilik jáne uıymdastyrýshylyq qabiletterin damytýǵa basymdyq beriledi. Sondaı-aq áskerı bólimderden kelgen serjanttardyń biliktiligin arttyrýǵa baǵyttalǵan kýrstyq daıarlyq júrgiziledi.
Al áskerden keıin bilim grantyn alǵandar qandaı mamandyqtardy tańdaǵanyn myna siltemden oqyńyz.
