Áskerı qyzmettiń bedeline nuqsan keltirgen azamatqa 82 700 teńge aıyppul salyndy
ASTANA. KAZINFORM — Áskerı qyzmettiń bedeline nuqsan keltirip, jalǵan aqparat taratqan azamat ákimshilik jaýapkershilikke tartyldy, dep habarlaıdy Qorǵanys mınıstrliginiń baspasóz qyzmeti.
QR Ákimshilik quqyq buzýshylyq týraly kodeksiniń 456-2-babynyń 2-bóligi («Jalǵan aqparatty ornalastyrý, taratý») boıynsha kináli dep tanylǵan azamat jaýapkershilikke tartyldy. Oǵan 20 AEK mólsherinde aıyppul salyndy.
Aıta ketý kerek, 26 maýsym kúni @egovpress Telegram-arnasynda jarııalanǵan beınematerıaldarda azamat ózin QR Qarýly Kúshteriniń áskerı qyzmetshisi retinde kórsetip, áskerı qyzmettiń bedelin túsiretin málimetter taratqan.
— Qorǵanys mınıstrligi júrgizgen tekserý nátıjesinde atalǵan azamattyń áskerı qyzmetke qatysy joqtyǵy jáne buǵan deıin Qarýly Kúshterde nemese ózge de áskerı quralymdarynda qyzmet atqarmaǵany anyqtaldy. Tekserý materıaldary ishki ister organdaryna joldanyp, onyń nátıjesi boıynsha azamat jalǵan aqparat taratqany úshin ákimshilik jaýapkershilikke tartyldy, — delingen habarlamada.
Qorǵanys mınıstrligi áskerı qyzmet pen Qarýly Kúshterdiń bedelin túsiretin jalǵan aqparatty taratý Qazaqstan Respýblıkasynyń zańnamasynda kózdelgen jaýapkershilikke ákep soǵatynyn eske salady.
Buǵan deıin ózin áskerı komıssarıat qyzmetkeri retinde tanystyrǵan astanalyq 10 táýlikke qamalǵanyn jazǵanbyz.
