Áskerı qyzmetten keıin suranysqa ıe mamandyq: Sarbaz+ jobasy qalaı jumys isteıdi
ASTANA. KAZINFORM - 78460 áskerı bóliminiń bazasynda júzege asyrylyp jatqan Sarbaz+ jobasy suranysqa ıe tehnologııalyq baǵyttar boıynsha mamandar daıarlaýǵa baǵyttalǵan, dep habarlaıdy QR Qorǵanys mınıstrliginiń baspasóz qyzmeti.
Áskerı daıyndyqpen qatar, joba qatysýshylary baǵdarlamalaý, kıberqaýipsizdik, ushqyshsyz ushý apparattaryn basqarý, baılanys júıelerine qyzmet kórsetý jáne derekterdi taldaý salalary boıynsha bilim alady.
Oqý barysynda zamanaýı tsıfrlyq platformalar, VR-trenajerler men arnaıy sımýlıatorlar qoldanylady. Daıyndyqty aıaqtaǵannan keıin qatysýshylar meńgergen bilimderi men daǵdylaryn rastaıtyn sertıfıkattarǵa ıe bolady. Bul olardyń merzimdi áskerı qyzmetten keıingi kásibı damýyna qosymsha múmkindik beredi.
Saltanatty rásimge Aşybulaq aýyldyq okrýgi ákiminiń orynbasary Kenjegúl Muratbekqyzy, Almaty oblystyq máslıhatynyń depýtaty, Sagadat Batyr sport klýbynyń negizin qalaýshy Nursultan Orynbasarov, Qarýly kúshterdiń ardagerleri, sondaı-aq áskerı qyzmetshilerdiń ata-analary men jaqyndary qatysty.
Áskerı antty merzimdi áskerı qyzmettiń 89 sarbazy qabyldady. Saltanatty rásim áskerı orkestrdiń súıemeldeýimen ótti. Sarbazdar dombyrada qazaqtyń kórnekti kúıshileri Qurmanǵazy men Dına Nurpeıisovanyń shyǵarmalaryn oryndap, qoıan-qoltyq urys tásilderin kórsetti. Іs-shara jeke quramnyń saltanatty marshymen aıaqtaldy.
– Búgin – meniń ómirimdegi eń mańyzdy kúnderdiń biri. Biz bul kúnge úlken jaýapkershilikpen keldik. Sarbaz+ jobasyna qatysý bizge tek áskerı mashyqtardy meńgerýge ǵana emes, sonymen qatar bolashaqta suranysqa ıe bolatyn zamanaýı bilim men quzyretterdi ıgerýge múmkindik beredi dep senemin, – dedi merzimdi áskerı qyzmetshi Dáýren Jaqaı.
Resmı bólim aıaqtalǵannan keıin ata-analar úshin áskerı bólim aýmaǵyna ekskýrsııa uıymdastyryldy. Qonaqtar áskerı qyzmet ótkerý jaǵdaılarymen tanysyp, kazarmalardy, ashanany jáne áskerı ınfraqurylym nysandaryn aralap kórdi.
Aıta keteıik, osyǵan deıin Prezıdent Qorǵanys mınıstrine Qarýly kúshterdiń jaýyngerlik daıarlyǵyn jetildirýdi tapsyrǵan bolatyn.
