Áskerı qyzmetshilerge taktıkalyq medıtsına oqytylady
ASTANA. KAZINFORM – Qazaqstan áskerı qyzmetshilerine taktıkalyq medıtsına oqytylady Ulttyq ulan Taktıkalyq medıtsına boıynsha hattama ázirleý jáne bekitý týraly bastama kóterdi, sondaı-aq telemedıtsınany damytýdy usyndy.
Bul týraly Qarýly Kúshterdiń, basqa da áskerleri men áskerı quralymdarynyń medıtsınalyq qyzmetteri ókilderiniń qatysýymen ótken vedomstvoaralyq keńes barysynda aıtyldy.
— Taktıkalyq medıtsına — tótenshe jaǵdaılarda tikeleı júzege asyrylatyn, jaraqat alǵan áskerı qyzmetshilerdiń ómirin qutqarýǵa jáne asqynýlardyń aldyn alýǵa baǵyttalǵan is-sharalar kesheni. Taktıkalyq medıtsınanyń basty qaǵıdasy — «altyn saǵat» prıntsıpin ustaný, ıaǵnı jedel kómek jaralanǵannan keıingi alǵashqy 60 mınýt ishinde kórsetilýi tıis, bul adam ómirin aman alyp qalý múmkindigin aıtarlyqtaı arttyrady, — deıdi Ulttyq ulannyń medıtsına mamany Erek Aqlasov.
Osy maqsatta, daǵdarys jaǵdaılarynda alǵashqy medıtsınalyq kómek kórsetýdiń qazirgi zamanǵy standartynyń taktıkalyq medıtsına hattamasyn ázirleý jáne bekitý josparlanyp otyr. Soǵan sáıkes, áskerı qyzmetshiler de tıisti baǵytta oqytylatyn bolady. Bul sheshim tabıǵı jáne tehnogendik sıpattaǵy tótenshe jaǵdaılar kezinde, apattar men jappaı tártipsizdikter saldaryn joıý kezinde el ishinde de, elden tys jerde de adam shyǵynyn boldyrmaýǵa nemese ólim deńgeıin tómendetýge múmkindik beredi. Elordalyq 5573 áskerı bóliminiń shtatynda quqyqtyq tártip áskeriniń áskerı medıtsına mamandary kýrsanttarmen praktıkalyq sabaqtar ótkizip jatyr. Taktıkalyq medıtsına kýrstary shuǵyl jaǵdaılarda medıtsınalyq kómek kórsetý kezindegi daǵdylardy qalyptastyrýǵa baǵyttalǵan. Osynyń arqasynda áskerı qyzmetshiler jaýyngerlik jaǵdaılarda tıimdi áreket etip qana qoımaı, kýrsta alǵan daǵdylaryn azamattyq ómirde de qoldana alady. Sonymen qatar, jaýyngerlik daıyndyq deńgeıin kóterýge kómektesedi. Dóńgelek ústel barysynda áskerge telemedıtsınany engizý máselesi qozǵaldy. Bul áskerı qyzmetshilerge áskerı-medıtsınalyq bólimshe mamandarynyń biryńǵaı derekqory arqyly qashyqtan dárigerlik keńes alýǵa múmkindik beredi. Joba shuǵyl jaǵdaılarda aýdıo jáne beınebaılanysty paıdalana otyryp, dárigerlermen jedel baılanysýǵa jaǵdaı jasaıdy.
Qoryta aıtqanda, taktıkalyq medıtsınany damytý jáne telemedıtsınalyq tehnologııalardy engizý — Qazaqstanda áskerı medıtsınanyń qazirgi zamanǵy jáne tıimdi júıesin qurýǵa mańyzdy qadam bolmaq.
Buǵan deıin Ulttyq ulan men Qarjylyq monıtorıng agenttigi qarjy pıramıdalarymen kúreste kúsh biriktiretini týraly jazǵan edik.