Áskerı qyzmetshilerge qoldaý kórsetetin AI-sulu Telegram-boty iske qosyldy

ASTANA. KAZINFORM —  Astanada áskerı psıhologter jınalysynda jasandy ıntellekt negizinde ázirlengen AI-sulu Telegram-boty tanystyryldy. Bul týraly Qorǵanys mınıstrliginiń baspasóz qyzmeti habarlady. 

Bul jańa qyzmet áskerı qyzmetshiler men olardyń otbasylaryna kúızelis jáne qıyn jaǵdaılarda táýlik boıy anonımdi túrde kómek kórsetýge arnalǵan.

– Psıhologııa – áskerdiń jaýyngerlik daıyndyǵyn qamtamasyz etýdiń mańyzdy elementi. Áskerı qyzmetshilermen jáne olardyń otbasylarymen tıimdi jumys isteý armııanyń moraldyq kúshiniń negizi bolyp tabylady, – dedi Qorǵanys mınıstriniń tárbıe jáne ıdeologııalyq jumystar jónindegi orynbasary vıtse-admıral Serik Borambaev jıyndy ashý kezinde.

Onyń aıtýynsha, qazirgi zamannyń talaptary ınnovatsııalyq tsıfrlyq sheshimderdi engizýdi qajet etedi. Solardyń biri – AI-sulu boty. Botty Ulttyq áskerı-patrıottyq ortalyǵy aqparattyq bóliminiń bastyǵy maıor Qasymhan Týıtın tanystyrdy.

– AI-sulu tiri mamannyń ornyn almastyra almaıdy, biraq ol qıyn sátterde alǵashqy kómek kórsetip, tyńdaı otyryp, qajetti keńes pen resýrstarǵa baǵyttaı alady, – dep atap ótti Týıtın.

Tsıfrlyq keńesshi qazaq jáne orys tilderinde qoljetimdi. Onyń basty artyqshylyǵy – anonımdilik pen táýlik boıy qoljetimdilik.

Jańa qyzmetti tanystyrý barysynda destrýktıvti minez-qulyqtyń aldyn alý, kúızelis turaqtylyǵyn damytý, psıhologııalyq jumystarda IT-quraldardy qoldaný jáne jastarmen jumys isteýdiń erekshelikteri talqylandy. Psıhoterapııa, sýıtsıdologııa jáne áskerı psıhologııa salasyndaǵy sarapshylar sóz sóıledi.

Qatysýshylar bul tájirıbe áskerı qurammen jumys isteýde óte paıdaly bolatynyn jáne áskerı psıhologııa qyzmeti úshin jańa ádistemelik materıaldardyń negizine aınalatynyn atap ótti. 

Aıta ketelik Qorǵanys mınıstrligi MyArmy.kz portalyn iske qosqan edi.