Áskerı qyzmetshilerge arnalǵan bilim granttary qalaı bólinedi
ASTANA. KAZINFORM — Qorǵanys mınıstrliginiń «Sarbaz 2.0» jobasy aıasynda bıyl merzimdi áskerı qyzmetin aıaqtaǵan 1 745 áskerı qyzmetshi memlekettik bilim berý grantyna ıe boldy.
Olardyń 1 000-nan astamy jańa oqý jylynda elimizdiń joǵary oqý oryndarynda bilim alýǵa kiristi.
Bastama 2023 jyldan beri júzege asyrylyp, zańnamalyq turǵyda bekitilgen. Bilim berý grantyna belgilengen merzimdi ótep, negizgi áskerı pánder boıynsha joǵary nátıjeler kórsetken áskerı qyzmetshiler úmitker bola alady.
Іrikteý merzimdi áskerı qyzmettiń barlyq kezeńinde «Sarbaz 2.0» tsıfrlyq júıesi arqyly júrgiziledi. Reıtıng qalyptastyrý kezinde jaýyngerlik daıarlyq nátıjeleri, áskerı tártip, arnaıy mindetterdi oryndaý, psıhologııalyq daıarlyq jáne testileý qorytyndylary eskeriledi. Osy kórsetkishter negizinde júıe úmitkerlerdiń reıtıngin qalyptastyryp, kvotalar avtomatty túrde bólinedi.
2025 jyldan bastap konkýrs bilim berý baǵdarlamalarynyń tańdalǵan tobyna sáıkes eki beıindik pán boıynsha testileýdi qamtıdy. Áskerı qyzmetshiler oǵan qyzmetten bos ýaqytta daıyndala alady.
Grant ıegerleriniń biri — Damır Tuzaqbaı. Áskerı qyzmetten keıin ol L. N. Gýmılev atyndaǵy Eýrazııa ulttyq ýnıversıtetine túsip, aqparattyq qaýipsizdik mamandyǵy boıynsha bilim alyp jatyr.
— Jaýyngerlik daıarlyqta joǵary nátıje kórsetip, ýnıversıtetke tegin túsý múmkindigine ıe boldym. Qazir «Aqparattyq qaýipsizdik» mamandyǵynda bilim alyp jatyrmyn. Qorǵanys mınıstrliginiń bul jobasy jastarǵa kórsetilip otyrǵan úlken qoldaý dep esepteımin, — dedi birinshi kýrs stýdenti.
Granttar arasynda suranysqa ıe baǵyttar qatarynda kommýnıkatsııalar, orman sharýashylyǵy, aqparattyq-kommýnıkatsııalyq tehnologııalar bar.
Grant ıegerlerine shákirtaqy taǵaıyndalady. Sondaı-aq jataqhanadan oryn alýǵa basymdyq beriledi.
Áskerden keıin bilimin jalǵastyrý múmkindigi grantpen ǵana shektelmeıdi. Merzimdi áskerı qyzmetten bosatylǵan azamattar eki jyl ishinde joǵary jáne joǵary oqý ornynan keıingi bilim berý uıymdaryna aqyly negizde UBT jáne qabyldaý emtıhandarynyń nátıjelerin esepke almaı túse alady.
Aıta ketelik elimizdegi bankter men shaǵyn qarjy uıymdary merzimdi áskerı qyzmetin atqaryp júrgen azamattarǵa nesıe berýge zańnamalyq tyıymdy saqtaýǵa mindetti.
