Áskerı qyzmetshilerge aqshalaı rızyq tóleý qaǵıdalary Konstıtýtsııaǵa sáıkestendirildi

ASTANA. KAZINFORM — 19 mamyrdan bastap «Qazaqstan Respýblıkasy Qarýly Kúshteriniń áskerı qyzmetshilerine aqshalaı rızyq, járdemaqy men basqa da tólem tóleý qaǵıdalaryn bekitý týraly» Qazaqstan Respýblıkasy Qorǵanys mınıstriniń 2017 jylǵy 2 maýsymdaǵy № 255 buıryǵyna engizilgen túzetýler kúshine endi. Bul týraly Konstıtýtsııalyq sot málim etti.

Túzetýler qatarynda buıryqty «Áskerı qyzmet jáne áskerı qyzmetshilerdiń mártebesi týraly» Zańǵa sáıkes keltirýge baǵyttalǵan normalar bar. Buǵan deıin Konstıtýtsııalyq Sot Qorǵanys mınıstriniń buıryǵymen bekitilgen aqshalaı rızyq tóleý qaǵıdalarynyń 26 jáne 30-tarmaqtarynyń erejelerin Konstıtýtsııaǵa sáıkes kelmeıdi dep tanyǵan bolatyn. 

— Vedomstvolyq buıryq Zańnyń erejelerine qaramastan, áskerı qyzmetshilerge áskerı qyzmet ótkerý kezeńinde olardyń áskerı emes laýazymdarda aqshalaı rızyq tóleýdi shektedi. Konstıtýtsııalyq Sot Mınıstrliktiń buıryǵy deńgeıinde mundaı shekteýdi belgileý eńbekke syıaqy tóleý quqyǵyn, jalaqynyń, zeınetaqynyń, áleýmettik qamsyzdandyrýdyń eń tómengi mólsheriniń kepildikterin zańdy negizder boıynsha bekitetin Konstıtýtsııaǵa, sondaı-aq quqyqtardy tek zańdarmen shekteý týraly erejege sáıkes kelmeıtinin atap ótti. Konstıtýtsııanyń 74-babyna sáıkes zańdar men ózge de quqyqtyq aktiler, olardyń Konstıtýtsııaǵa sáıkes emes dep tanylǵan jekelegen erejeleri joıylady jáne qoldanylmaıdy, — delingen habarlamada.

Osyǵan baılanysty Qorǵanys mınıstrligi qoldanystaǵy zańǵa sáıkes vedomstvolyq buıryqty júrgizý boıynsha qosymsha sharalar qabyldady.

Eske sala keteıik, elimizde sarbazdarǵa kredıt berýge tyıym salý mehanızmi ázirlendi.