Áskerı qyzmetshilerdiń ratsıonyna jylqy eti qashan qosylady — Jumanǵarın jaýaby
ASTANA. KAZINFORM — Májilis depýtattarynyń saýalyna jaýap bergen Premer-mınıstrdiń orynbasary — Ulttyq ekonomıka mınıstri Serik Jumanǵarın áskerı qyzmetshilerdiń ratsıonyna jylqy eti qashan qosylýy múmkin ekenin aıtty.
— Qorǵanys jáne Іshki ister mınıstrlikteri jylqy etin áskerı qyzmetshilerdiń ratsıonyna qosý máselesin qoldaıdy Onyń joǵary bıologııalyq qundylyǵyn jáne jeke quramnyń fızıkalyq jaǵdaıyna yqtımal oń áserin atap ótedi. Sonymen qatar, tıisti sheshim qabyldaý keshendi ǵylymı zertteýler júrgizýdi talap etedi. Obektıvti derekterdi alý maqsatynda makro jáne mıkroelementterdiń, bıologııalyq belsendi zattardyń quramyn, kalorııalylyǵyn, taǵamdyq qundylyǵyn, sińimdiligin, vıtamınder men mıneraldardyń quramyn baǵalaý, tutynýdyń ońtaıly normalaryn aıqyndaý úshin Qazaq tamaqtaný akademııasynyń qorytyndysy qajet, — dedi ol.
Vıtse-premerdiń paıymynsha, atalǵan zertteýlerdiń nátıjeleri jylqy etin áskerı qyzmetshilerdiń ratsıonyna engizýdiń usynylatyn kólemin negizdi anyqtaýǵa, onyń fızıkalyq tózimdilikke jáne joǵary júktemelerge beıimdelýine áserin baǵalaýǵa, áskerı bólimder jaǵdaıynda ónimdi saqtaý men daıyndaýdyń tehnologııalyq reglamentterin ázirleýge múmkindik beredi.
— Tıisti máselelerdi áskerı vedomstvolar belgilengen tártippen pysyqtaıtyn bolady, — dedi Serik Jumanǵarın.
Buǵan deıin mektep ashanasy mázirine jylqy eti qosylǵanyn jazǵan edik.