Áskerı qyzmetshiler úılerin tsıfrly túrde jekeshelendire alady - mınıstrlik
ASTANA. KAZINFORM – 19 qyrkúıekte áskerı qyzmetshilerge arnalǵan turǵyn úıdi tsıfrly jekeshelendirý jobasy bastaldy. Qazir ótinish berýden bastap jyljymaıtyn múlikke quqyqty tirkeýge deıingi protsess 2 jylǵa deıin ýaqyt alýy múmkin. Al elektrondy qyzmet engizilgen soń protsess 2 aıǵa deıin qysqarady.
Qarjy mınıstrligi baspasóz qyzmetiniń málimeti boıynsha jekeshelendirýdiń barlyq protsesi tsıfrly formatta júredi. Soǵan sáıkes qarýly kúshter ókilderine qujat jınap, túrli vedomstvolardyń tabaldyryǵyn attaýdyń qajeti bolmaıdy. Ótinish berýshiniń memlekettik organdarmen ózara is-qımyly memlekettik derekter bazasyn ıntegratsııalaý arqyly tsıfrly platformada júzege asyrylady. Qazir bul qyzmetti HQKO-da turǵyn úıdi jekeshelendirý týraly kelisimsharttardy memlekettik tirkeýdi júzege asyrýǵa múmkindik beretin júıemen ıntegratsııalaý aıaqtalýǵa jaqyn.
«Azamattarǵa arnalǵan úkimet» memlekettik korporatsııasynyń derekter bazasymen ıntegratsııa protsesin aıaqtap jatyrmyz. Osy arqyly elektrondy kelisimsharttar memlekettik derekter bazasynda avtomatty túrde tirkeledi nemese HQKO-da qol qoıylǵan jáne mórleri bar qaǵaz nusqalarmen qatar qabyldanady. Bul – bıýrokratııany azaıtý jáne tsıfrlandyrýdy ilgeriletý baǵytyndaǵy mańyzdy qadam», - dedi Qarjy vıtse-mınıstri Áset Turysov.
Qorǵanys mınıstrliginiń málimetine súıensek, búginde jekeshelendirý kezeginde 3,5 myń adam tur. Olar - QR QK-de áskerı qyzmette jáne eńbek qatynastarynda turǵan azamattar. Jekeshelendirý quqyǵyn qyzmettik úıdi 10 jyldan artyq jalǵa alyp turǵandar ǵana paıdalana alady. Bul rette ótinish berýshi jyljymaıtyn múliktiń qaldyq qunyn tóleýge tıis ekenin atap ótken jón. Al qyzmettik baspanada 20 jyldan kóp (jalǵa alǵandar) turǵandar óteýsiz negizde jekeshelendirýge quqyly, ıaǵnı olar memleketten páterdi tegin alý múmkindigine ıe.
Aldaǵy ýaqytta áskerılerden bólek mundaı qyzmet azamattardyń basqa sanattary úshin de ashylmaq.
Aıta ketsek, 9 qyrkúıekte e-Qazyna.kz platformasynda ázirleýshiler jekeshelendirý quraly retinde paıdalanýǵa usynylǵan ASKERGE SHANYRAQ jańa tsıfrly servısin tanystyrdy (Askerge-shanyraq.e-Qazyna.kz). Bul servısti QR QM «Aqparattyq-esepteý ortalyǵy» AQ ázirlep shyǵarǵan.
Eske salsaq, senator Andreı Lýkın Premer-Mınıstrdiń atyna tıisti depýtattyq saýal joldap, áskerı qyzmetshilerge arnalǵan jeńildikterdi qaıtarýdy usynǵan bolatyn.
