Bıyl 20 myńǵa jýyq áskerı qyzmetshiniń nesıeleri keıinge qaldyryldy
ASTANA. KAZINFORM — Keıinge qaldyrylǵan qaryzdardyń jalpy somasy 7,5 mlrd teńgeni qurady, dep habarlaıdy Qarjy naryǵyn retteý jáne damytý agenttigi.
2024 jyldan bastap Qazaqstan Respýblıkasynyń Qarýly Kúshterinde merzimdi áskerı qyzmet ótkeretin azamattar mıkrokredıtter men banktik qaryzdar boıynsha óz mindettemelerin oryndaýdy keıinge qaldyrý quqyǵyna ıe boldy. Qaǵıdalarǵa sáıkes, barlyq qyzmet etý merzimine jáne demobılızatsııadan keıin 60 kún ishinde paıyzdar, aıyppuldar men ósimpuldar eseptelmeı tólem merzimi keıinge qaldyrylady.
2025 jyldyń basyndaǵy derekterge sáıkes, merzimdi áskerı qyzmetke shaqyrylǵan 22,4 myń qaryz alýshynyń 20,1 myńynyń qaryzdary keıinge qaldyryldy. Keıinge qaldyrylǵan qaryzdardyń jalpy somasy 7,5 mlrd teńgeni qurady.
Tólem merzimin keıinge qaldyrý úshin ne isteý kerek?
Tólem merzimin keıinge qaldyrý ótinishsiz beriledi: shaqyrý týraly derekterdi Qorǵanys mınıstrligi kredıttik bıýroǵa, sodan keıin bankter men mıkroqarjy uıymdaryna jiberedi. Bankter men mıkroqarjy uıymdary habarlamany alǵan sátten bastap kúntizbelik 15 kún ishinde tólem merzimin keıinge qaldyrýdy resimdeýge mindetti.
Aqparattandyrý jazbasha jáne/nemese onlaın rejıminde jeke qatysý qajettiliginsiz nemese qosymsha kelisimderge qol qoıýsyz júzege asyrylady.Shara negizgi borysh pen esepteletin syıaqyǵa qoldanylady.
Sondaı-aq, keıinge qaldyrý kezeńinde aıyppuldar, ósimpuldar esepteýge jáne óndirip alý sharalaryn qoldanýǵa tyıym salynady. Áskerı bólimniń tiziminen merziminen buryn shyǵarylǵan jaǵdaıda tólem merzimin keıinge qaldyrý taǵy 60 kúnge saqtalady.
Tólem merzimin keıinge qaldyrýdan bas tartýdy qalasa, qaryz alýshy kúntizbelik 14 kún ishinde jazbasha ótinish joldaýǵa quqyly, mundaı jaǵdaıda kredıtor keıinge qaldyrýdy qoldanýdy joıady.
Eger kredıt boıynsha sot sheshimi shyǵarylsa, tatýlasý kelisimi jasalsa nemese atqarýshylyq jazba resimdelse, tólem merzimi keıinge qaldyrylmaıdy. Tólem merzimi avtomatty túrde keıingi qaldyrylmaǵan jaǵdaıda, áskerı qyzmetshi:
— qarjy uıymyna jazbasha ótinish jibere alady;
— Qarjy naryǵyn retteý jáne damytý agenttigine júgine alady.
2025 jylǵy 9 sáýirde Qazaqstan Respýblıkasy Parlamenti Májilisiniń depýtattary qarjy naryǵyn damytý jáne qarjylyq qyzmetterdi tutynýshylardyń quqyqtaryn qorǵaý máseleleri jónindegi zań jobasyn ekinshi oqylymda maquldady. Túzetýlerdiń qatarynda — áskerı qyzmetshilerge merzimdi áskerı qyzmet ótkerý kezeńinde qaryz berýge tyıym salýdy engizý.
Jastar búginde nesıeniń tuzaǵyna túsip, qaryzǵa belsheden batyp barady. Olar ne sebepti nesıeni ústi-ústine rásimdep, osyndaı jaǵdaıǵa jetken? Jastardy bul tordan qalaı bosatamyz? Kazinform tilshisi máseleniń mánisine úńilip kórdi.