Áskerı qyzmetshiler Tobyl ózeniniń jaǵalaýyn qummen nyǵaıtyp jatyr

ASTANA. KAZINFORM – Qorǵanys mınıstri Rýslan Jaqsylyqov Qostanaı oblysyna jumys saparymen baryp, Tobyl ózeni jaǵalaýyndaǵy jaǵdaımen tanysty. Bul týraly Qorǵanys mınıstrliginiń resmı ókili Rýslan Jangýlın málim etti.

«Osy kúnderi Qarýly Kúshterdiń quramy sý tasqyny apatymen kúres jumystaryna jumyldyryldy. 7 sáýirdegi málimet boıynsha, Qarýly kúshterden 814 áskerı qyzmetshi bólindi jáne 44 tehnıka, 3 tikushaq, 2 ushaq tartyldy. Avıatsııanyń kómegimen jalpy sany 262 adam jáne 4200 keli júk tasymaldandy. Osy kúnge deıin tikushaqtar 19, al ushaqtar 2 reıs jasady. Jeke quram 44 myń qum salynǵan qaptardy daıyndady. MI-8 tikushaqtarymen 178 adam, onyń ishinde 98 bala tasymaldandy. S-205 ushaǵymen Almatydan Qostanaıǵa jabdyqpen 40 adam jetkizildi. Qostanaı oblysynda aýmaqtyq qorǵanys brıgadasynyń 70 áskerı qyzmetshisi Tobyl qalasynda (Qostanaı aýdany) 8 myń qap qum daıyndap, Tobyl ózeniniń jaǵalaýyn nyǵaıtyp jatyr», - dedi Rýslan Jangýlın Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, Qostanaı óńirine Qorǵanys mınıstri Rýslan Jaqsylyqov jumys saparymen bardy. Mınıstr Tobyl ózeni jaǵalaýyndaǵy jaǵdaıdy tekserip, jergilikti qorǵanys brıgadasyna naqty tapsyrmalar berdi.

Eske sala ketsek, Memleket basshysynyń tapsyrmasy boıynsha sý basqan óńirlerge Qarýly Kúshterden qosymsha 300-ge tarta jeke quram jáne 32 áskerı tehnıka jumyldyryldy.

Aıta ketsek, Qarýly kúshterdiń deni Qulsaryda qutqarý jumysyn júrgizip jatyr.