Áskerı qyzmetshiler ótinishti anonımdi joldaı alady

Memleket basshysynyń Joldaýynda tsıfrlyq transformatsııaǵa erekshe nazar aýdaryldy. Osy baǵytta QR ІІM Ulttyq ulany áskerı qyzmetti jetildirý jáne jeke quram men qolbasshylyq arasyndaǵy ózara baılanysty nyǵaıtý maqsatynda otandyq tsıfrlyq sheshimderdi engizip keledi. Osyndaı jobalardyń biri — ULAN SENIM júıesi Alataý qalasyndaǵy 6654 áskerı bóliminde synaqtan ótkizilip jatyr.

— Joba qazaqstandyq Aitu messendjeri negizinde ázirlengen. Áskerı qyzmetshi QR-kodty skanerleý arqyly qosymshaǵa ótip, qolbasshylyqqa anonımdi túrde ótinish joldaı alady, — delingen habarlamada.

Júıeni paıdalaný tártibi qarapaıym. Áskerı qyzmetshi ótinish sanatyn tańdap, máseleniń mán-jaıyn jazady da, qosymsha arqyly joldaıdy. Júıege túsken ótinishke biregeı nómir berilip, tıisti sharalar qabyldaý úshin qolbasshyǵa jiberiledi. Ár ótinishti qaraýǵa úsh kún ýaqyt beriledi.

Ótinishter áskerı qyzmettiń túrli baǵyttaryn qamtıdy. Atap aıtqanda, zańdylyqty saqtaý, sybaılas jemqorlyq pen laýazymdyq ókilettikterdi teris paıdalanýdyń aldyn alý, áleýmettik-turmystyq jaǵdaı, materıaldyq qamtamasyz etý, áskerı qyzmetshilerdiń quqyqtaryn qorǵaý, qyzmettik máseleler men moraldyq-psıhologııalyq ahýal. Sondaı-aq júıe arqyly jeke quram arasyndaǵy kelispeýshilikter týraly habarlaýǵa nemese qyzmetti uıymdastyrýdy jaqsartý jóninde usynys engizýge bolady.

Máselen, ulandyq kún tártibine ózgeris engizýdi, demalys kúnderin uıymdastyrýdy jaqsartýdy nemese sarbazdar ashanasynyń mázirin jańartýdy usyna alady. Osylaısha, júıe jeke quramnyń pikirin eskerip, áskerı ujymdardyń kúndelikti tynys-tirshiliginde týyndaıtyn máselelerge der kezinde nazar aýdarady.

— ULAN SENIM júıesinde anonımdi ótinish joldaý, sanatyn tańdaý, ótinishtiń mártebesin baqylaý jáne buryn jiberilgen ótinishterdiń tarıhyn kórý bólimderi qarastyrylǵan. Al qolbasshylyq quram úshin kelip túsken ótinishterdiń qaralýy men oryndalýyn baqylaýǵa múmkindik beretin jeke kabınet bar, — delingen habarlamada.

Mundaı tetikti engizý «Zań men tártip» qaǵıdatyna saı keledi. Ótinishti anonımdi túrde joldaý, árbir ótinishti tirkeý jáne ony qaraý merzimin baqylaý ashyqtyq pen jaýapkershilikti arttyryp, senimdi nyǵaıtýǵa yqpal etedi.

Qazirgi ýaqytta ULAN SENIM júıesi 6654 áskerı bóliminde synaqtan ótkizilip jatyr. Bul kezeńde platformanyń fýnktsıonaldyq múmkindikteri tekserilip, ótinishterdi joldaý, tirkeý jáne qaraý, sondaı-aq olardyń oryndalýyn baqylaý tetikteri pysyqtalýda. Júıeni paıdalaný barysynda anyqtalǵan kemshilikter túzetilip, ony Ulttyq ulannyń barlyq áskerı bólimderine engizý múmkindigi qarastyrylady.

Aıta ketelik Astanada 750-ge jýyq ulandyq áskerı ant qabyldady.