Áskerı qyzmetshiler men olardyń otbasylaryna áleýmettik qoldaý keńeıtildi
ASTANA. KAZINFORM – Astanadaǵy Ulttyq áskerı-patrıottyq ortalyqta Qorǵanys mınıstriniń tárbıe jáne ıdeologııalyq jumys jónindegi orynbasary general-maıor Asqar Mustabekovtiń Qarýly kúshterdiń ardagerlerimen kezdesýi ótti.
Іs-sharany asha otyryp, Qorǵanys mınıstriniń orynbasary Qazaqstan Respýblıkasy Prezıdentiniń tapsyrmasyna sáıkes Qarýly kúshterde tárbıe jáne ıdeologııalyq jumysty, ásirese jastardyń áskerı-patrıottyq tárbıesin kúsheıtý baǵytynda júıeli jumystar júrgizilip jatqanyn atap ótti. Sondaı-aq qazirgi kúrdelenip otyrǵan áskerı-saıası jaǵdaıda ardagerlerdiń kásibı tájirıbesi men ómirlik danalyǵynyń mańyzy erekshe ekenin aıtty.
– Ardagerler biz úshin ótkenniń ókili emes, jas áskerı qyzmetshilerge ar-namys, paryz jáne Otanǵa adaldyq qundylyqtaryn jetkizetin armııanyń senimdi kúshi. Sizderdiń arqalaryńyzda Qarýly kúshterdiń rýhanı negizin jáne jaýyngerlik qabiletin qalyptastyratyn áskerı dástúrler saqtalyp, nyǵaıýda, – dep atap ótti general-maıor Asqar Mustabekov.
Kezdesý barysynda ol áskerı qyzmetshilerdi áleýmettik qoldaý sharalary týraly da habardar etti. Atap aıtqanda, dalalyq tólemderdiń qaıta engizilýi, azyq-túlik úlesi qunynyń artýy, sondaı-aq áskerı qyzmetshiler men olardyń otbasy músheleriniń demalys ornyna baryp-qaıtýy úshin temirjol kóliginde tegin júrý múmkindigi qarastyrylǵanyn alǵa tartty.
Sonymen qatar 2025 jyly qabyldanǵan jastarmen áskerı-patrıottyq jumys júrgizýge baǵyttalǵan normatıvtik-quqyqtyq aktilerge erekshe nazar aýdaryldy. Qazirgi tańda bul baǵytta respýblıkalyq úılestirý keńesi, memlekettik jáne jergilikti atqarýshy organdar birlesip jumys isteýde.
Kezdesýge qatysýshylar áskerı-patrıottyq tárbıe isi tájirıbege baǵyttalǵan, mazmuny jaǵynan jandandyrýdy qajet etetin jáne tsıfrlyq ortada belsendi jastardyń qyzyǵýshylyqtaryna saı bolýy tıis degen ortaq pikirge keldi. Bul salada formalızmge jol berýge bolmaıtyny atap ótildi.
Ardagerler men mınıstrlik basshylyǵy Qarýly kúshterdiń bedeli men qoǵamnyń senimin nyǵaıtý úshin ózara is-qımyldyń jańa formattaryn engizý, aqparattyq jumysty jandandyrý jáne zamanaýı kommýnıkatsııalyq arnalardy keńinen qoldaný qajettigin qoldady.
Aıta ketelik áskerı ınstıtýtta ushqyshsyz ushý apparat mamandaryn daıarlaıtyn mektep ashyldy.