Áskerı qyzmetshiler maıdanger Táńirbergen Tolǵanbaevty 102 jasqa kelýimen quttyqtady
ASTANA.KAZINFORM — Jeńis kúni qarsańynda Almaty oblysy Іle aýdanynyń jáne Alataý qalasynyń qorǵanys isteri jónindegi birikken bóliminiń áskerı qyzmetshileri, áskerı-patrıottyq klýbtardyń tárbıelenýshileri Uly Otan soǵysynyń ardageri Táńirbergen Tolǵanbaevty 102 jasqa tolǵan kúnimen quttyqtady. Bul týraly Qorǵanys mınıstrligi málim etti.
Olar Qorǵanys mınıstri atynan ardagerge eren eńbegi úshin asqan rızashylyqtaryn bildirip, estelik syılyqtar tabys etip, oǵan zor densaýlyq, uzaq ómir jáne sergektik tiledi.
Táńirbergen Tolǵanbaev 1923 jyly 1 mamyrda Taldyqorǵan oblysy, Aqsý aýdany, Kırov kolhozynda dúnıege kelgen. 1942 jyly mamyrda 19 jasar jigitti Aqsý aýdandyq áskerı komıtetimen Keńes áskeriniń qataryna shaqyryldy.
– 1942 jyly bizdi Lepsige jınady. Poıyzǵa qaıtseń de keshikpeý kerek, keshikseń trıbýnal kútip tur. Anam meni ertip bardy. Úlgerý úshin túni boıy túıemen júrip otyrdyq. Poıyz qozǵalǵan kezde anam artynan ilese jylap júgirdi, – dep eske alady ardager.
Ol áskerı qyzmetin Kavkazdaǵy shekara áskerlerinde bastady. Oqý-jattyǵý ortalyǵynda jas jaýyngerdi mergen mamandyǵyna daıyndady. Alda Stalıngrad mańyndaǵy qandy shaıqastar boldy. Kavkazdaǵy daıarlyq maıdanger úshin erik-jigeri qaıralyp, jaýyngerlik mashyǵy shyńdalǵan naǵyz ómir mektebine aınaldy. Kópultty quramnyń arasynda Erevandaǵy shekara jasaǵynda qyzmet etip, sonda orys tilin úırendi. 1949 jyly elge oraldy. Aldymen sottyń hatshysy, sodan keıin kishi leıtenant shenimen jedel ýákil boldy. Stalınabad mılıtsııa mektebin, keıin Kırov atyndaǵy QazMÝ zań fakýltetin bitirgen.
On jyl boıy Táńirbergen Tolǵanbaev Almaty oblysynyń Jambyl AІІB basqardy. 1976 jyldan bastap Іle aýdanynyń prokýratýrasynda jumys istep, onda ol azamattardyń quqyqtaryn zań júzinde ári ádil qorǵaýshy retinde qurmetke ıe boldy. Keıingi jyldary Buryndaı qant zaýytynda zań keńesshisi bolyp jumys istedi.
Erligi men minsiz qyzmeti úshin maıdanger «Kavkazdy qorǵaǵany úshin», Jýkov medaldarymen, basqa da mereıtoılyq nagradalarmen jáne erekshe belgilermen marapattaldy. Táńirbergen Tolǵanbaev – Іle aýdanynyń Qurmetti azamaty.
Maıdanger kóp jyl ustazdyq etken jubaıy – Dámeli Álpeıisovamen birge alty bala tárbıelep ósirdi. Olardan 12 nemere, 16 shóberesi jáne bir shópshek súıip otyr.
Buǵan deıin habarlanǵandaı, Maıdanger qalamgerlerdiń shyǵarmasy aýdıokitap formatynda shyqty.