Áskerı qyzmetshiler qalaı tamaqtanady: jeke tamaqtaný ratsıonynyń quramyna ne kiredi
ASTANA. KAZINFORM — Áskerı qyzmet kóbine qolaısyz jaǵdaılarda — polıgondarda, alys aımaqtarda jáne oqý-jaýyngerlik tapsyrmalardy oryndaý kezinde ótedi.
Alaıda qandaı jaǵdaıda bolmasyn ózgermeıtin qaǵıda bar: áskerı qyzmetshi kıimmen, aıaq kıimmen jáne tolyqqandy tamaqpen qamtamasyz etilýi tıis.
Qorǵanys mınıstrliginiń málimetinshe, ystyq tamaq uıymdastyrý múmkin bolmaǵan jaǵdaıda Qarýly kúshterde jeke tamaqtaný ratsıondary (JTR) qoldanylady. Onyń úsh negizgi túri bar: jalpyáskerı, Desanttyq-shabýyldaýshy áskerlerge arnalǵan jáne keme men kater ekıpajdaryna arnalǵan borttyq ratsıon.
Jeke ratsıondar áskerı qyzmetshilerge jol ústinde, oqý-jattyǵýlar kezinde, polıgondarda, áskerı bólimderden alys ornalasqan bólimshelerde, sondaı-aq tótenshe jaǵdaılar men tabıǵı apattar aımaqtarynda beriledi.
Árbir ratsıon jeti kúnge eseptelgen jáne onyń quramyna galetter, et konservileri, pashtet, jylqy etinen jasalǵan súrlengen ónimder, balqytylǵan irimshik, qoıýlatylǵan sút, shokolad, keptirilgen jemister, shaı, kofe, qant jáne tuz kiredi. Ratsıonnyń ortasha energetıkalyq qundylyǵy táýligine shamamen 4170 kılokalorııa.
Barlyq ónim ulttyq jáne memleketaralyq standarttarǵa saı óndiriledi ári quramynda genetıkalyq túrlendirilgen aǵzalar joq. Olar germetıkalyq túrde qaptalyp, uzaq ýaqyt saqtaýǵa jáne syrtqy áserlerden qorǵaýǵa múmkindik beredi.
Sonymen qatar jınaqta portatıvti jylytqysh, sý men jelge tózimdi sirińke, sýdy zalalsyzdandyrý quraldary, maılyq, bir rettik qasyq jáne jınalmaly metall konservi ashqysh bar.
Osyndaı oılastyrylǵan azyq-túlikpen qamtamasyz etý júıesi áskerı qyzmetshilerdiń kúsh-qýat daıyndyǵy men jaýyngerlik qabiletin kúrdeli ári standartty emes jaǵdaılarda da saqtaýǵa múmkindik beredi.
Aıta ketelik Oralda Ulttyq ulan qatarynda egizder saltanatty túrde ant bergen edi.