Áskerı qyzmetshi Respýblıka kúnine oraı 600 shaqyrym júgirip, rekord jańartpaq

ASTANA. KAZINFORM — Astanadaǵy aýmaqtyq qorǵanys brıgadasy bólimshesiniń komandıri 3-synypty serjant Raýan Ábilhanov Astana — Kókshetaý — Astana baǵyty boıynsha ara qashyqtyǵy 600 shaqyrym bolatyn biregeı sporttyq synaqqa — sýpermarafonǵa daıyndalyp jatyr. Bul týraly QR Qorǵanys mınıstrligi habarlady. 

Ol bul bastamasyn ulttyq mereke — Respýblıka kúnine arnap, júgirýdi 25 qyrkúıekte bastaýdy josparlap otyr. Áskerı qyzmetshi osy maqsaty arqyly qazaqstandyq ýltramarafondardyń barlyq aldyńǵy rekordtaryn jańartpaq.

— Raýan Ábilhanovtyń bastamasy Qazaqstan Respýblıkasy Qarýly kúshteri men Astana qalasy ákimdiginiń áskerı qyzmetshileri tarapynan qoldaý tapty. Serjant Ábilhanovtyń júgirýde rekord jasaýdan tájirıbesi bar. Ol 2022 jyly Almaty oblysyndaǵy «Álı» oqý-jattyǵý ortalyǵynan Shelek aýyly baǵyty boıynsha 48 saǵat ishinde 350 shaqyrymdy júrgirip ótip, Qazaqstannyń rekordtar kitabyna endi, — delingen aqparatta.

42 jastaǵy sportshy 15 jyldan astam jeńil atletıkamen aınalysady. Almatyda jáne áskerı qyzmetshiler arasynda marafondardyń birneshe dúrkin jeńimpazy. Aldaǵy marafonnan ózge onyń josparynda 10 kúnde 1000 shaqyrym júgirý — jańa jobasy da bar.

Aıta keteıik, buǵan deıin Qorǵanys mınıstrliginiń áskerı qyzmetshisi 80 shaqyrym marafon júgirgenin jazǵan bolatynbyz.