Áskerı qyzmetkerlerden aqsha jınaǵan «Tasmola» shekara bólimshesiniń bastyǵy sottaldy
AQTÓBE. KAZINFORM — Cultan Qonarovqa 20-ǵa jýyq áskerı qyzmetkerdi qorqytyp, aqsha jınap, ony óz qajettiligine jumsaǵany úshin aıyp taǵyldy. Sot «Tasmola» shekara bólimshesiniń bastyǵyn 6 jylǵa bas bostandyǵynan aıyrý jazasyn taǵaıyndady.
Aqtóbe garnızonynyń áskerı sotynda Batys Qazaqstan oblysy «Tasmola» shekara bólimshesiniń bastyǵy Cultan Qonarovqa qatysty isti qaraldy. Oǵan Qylmystyq kodekstiń «Bılikti asyra paıdalaný» baby boıynsha aıyp taǵyldy.
Іs materıalyna súıensek, kelisimshart negizinde jumys isteıtin áskerı qyzmetshilerge «Shekara bólimshesine jóndeý jumystaryn júrgizý kerek. Sol úshin árqaısysyńnan 15 000 teńgeden aqsha jınaımyz. Osy aqshanyń barlyǵyn qatardaǵy jaýyngerdiń abonenttik nómirine salyńdar» dep buıyrady. Sóıtip QR Qarýly kúshteriniń áskerı jarlyǵyn buzady, ishki erejeni saqtamady. Buıryqty eki etpegen 20-ǵa jýyq áskerı qyzmetshi 15 myń teńgeden aýdarady. Sottalýshy Cultan Qonarov aqsha jınalǵan soń 20 myń teńge qaryzyn jabady. Odan ári birneshe dúkennen úıine qajetti zattardy satyp alyp, aqysyn jınalǵan aqshadan aýdarady. Tipti shekara beketi aýmaǵyndaǵy modýldi úıine plastıkalyq terezege tapsyrys beredi. Jeke quramnan zańsyz jınalǵan aqshanyń qalǵan 60 000 teńgesin qolma-qol alady.
Sot otyrysynda eńbek demalysyna shyqqan qyzmetkerlerden de «maǵan birdeńe alyp ber» dep suraǵany anyqtaldy. Sóıtip birneshe aıaq kıim, sómke aldyrǵan, kóterme aqynyń bir bóligin de ıemdengen. Sottalýshy 15 000 teńgeden bastalǵan aqsha jınaý úrdisin 100 000 — 150 000 teńgege deıin jetkizdi. Keıbirine dúkenderdegi qaryzyn japtyrsa, bir bóligi sottalýshynyń áıeliniń telefon nómirine aqsha aýdarǵan.
Sot otyrysynda sottalýshy ózine taǵylǵan aıypty moıyndamady. Qylmystyq isti óziniń ornynda ýaqytsha mindetin atqarýshy bolyp qalǵan áskerı qyzmetshi uıymdastyrǵanyn aıtty.
Aqtóbe garnızonynyń áskerı sotynyń úkimimen Sultan Qonarov kináli dep tanylyp, 6 jyl merzimge bas bostandyǵynan aıyryldy. Sottalýshy áskerı, memlekettik salada jumys isteý quqyǵynan ómir boıyna aıyryldy. Jazany qylmystyq-atqarý júıesiniń ortasha qaýipsiz mekemesinde óteıdi. Sonymen birge jábirlenýshilerdiń talap aryzy tolyq qanaǵattandyryldy.
Eske salsaq, kýrsant óliminen soń Aqtóbede eki áskerı qyzmetker sottaldy. Sottalýshylarǵa Qylmystyq kodekstiń 453-baby 2-bóligimen aıypty dep tanyldy.
