Áskerı kıimderdi erkin saýdada satýǵa shekteýler engiziledi
ASTANA. QazAqparat - Áskerı kıimderdi erkin saýdada satýǵa shekteýler engiziledi. Bul týraly búgin Parlament Senaty Ekonomıkalyq saıasat, óńirlik damý jáne kásipkerlik komıtetiniń keńeıtilgen otyrysy barysynda «Qazaqstan Respýblıkasynyń keıbir zańnamalyq aktilerine saýda qyzmetin retteý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda málim boldy.
Qujattyń maqsaty saýda qyzmetin memlekettik retteýdiń ádisteri men nysandaryn júıelendirý, elektrondyq saýda salasyndaǵy kásipkerlik sýbektileriniń qyzmetin, bırjalyq qyzmet salasyn odan ári jetildirý bolyp otyr. Sonymen qatar, zań jobasynda elimizdiń syrtqy saýdany retteý salasyndaǵy zańnamasyn halyqaralyq sharttarǵa, sonyń ishinde Keden odaǵy men DSU normalaryna sáıkestendirý kózdeledi.
Budan bólek, zań jobasynda elektrondyq saýdany júzege asyrý barysynda satýshynyń, onyń ishinde satýshynyń ózi týraly aqparat berý mindeti qarastyrylyp otyr. Sonymen qatar, elektrondyq saýda barysynda tutynýshylardyń quqyqtaryn qorǵaý normasy qamtylady.
Ulttyq ekonomıka vıtse-mınıstri Tımýr Jaqsylyqovtyń aıtýynsha, zań jobasynda ishki saýda qyzmeti baǵytynda azyq-túlik taýarlarynyń tabıǵı shyǵyndaryn bekitý boıynsha Úkimettiń quzyrettiligi aıqyndalady.
Sonymen qatar, zań jobasynyń aıasynda arnaıy kıimderdi paıdalaný arqyly quqyq buzýshylyqtar, qylmystar jasaýdy tejeý sharalary qamtylyp otyr. Atap aıtqanda, áskerı jáne arnaıy kıimder, nysandy kıimderge jatatyn taýarlardy erkin saýdada satýǵa shekteýler belgilenedi. Budan basqa, zań jobasymen «100 naqty qadam» Ult josparyn júzege asyrýǵa baǵyttalǵan normalar da qamtylyp otyr.
Talqylaýdan soń, komıtet músheleri zań jobasyn aldaǵy ýaqytta ótetin palatanyń jalpy otyrysyna shyǵarý týraly sheshim qabyldady.
