Áskerı qaıratker Kım Serikbaev ómirden ótti
ALMATY. QazAqparat - Áskerı qaıratker, polkovnık, áskerı ǵylym kandıdaty Kım Serikbaıuly Serikbaev dúnıeden ótti, dep habarlaıdy QazAqparat tilshisi.
Qaraly habardy Almaty qalasyndaǵy «UOS ardagerleri, tyl eńbekkerleri jáne soǵys balalary keńesi» qoǵamdyq qory rastady.
«Iá, ol kisi búgin koronavırýs ınfektsııasynan qaıtys boldy. Aýrýhanada bes kún jatty», - dep habarlady qordaǵylar.
Kım Serikbaıuly 1934 jyly 14 qańtarda Aqtóbe oblysy Hromtaý aýdany Kóptoǵaı aýylynda dúnıege kelgen. 1952-1956 jyldary qazirgi QazMÝ-de, Ýfa áskerı ýchılışesinde oqydy. 1970 jyly Máskeýdegi áskerı akademııany bitirgen.
Ǵumyrynyń sońǵy jyldarynda ardagerler keńesiniń tóraǵasy qyzmetin atqarǵan.
1956-1966 jyldary Qıyr, Shyǵys, Prıkarpate, Máskeý, Orta Azııa áskerı okrýgterinde vzvod, rota, batalon komandıri, motoatqyshtar polkynda shtab bastyǵy, polk komandıri bolyp qyzmet atqarǵan.
1970-1973 jyldary Máskeýdegi áskerı akademııada Kýbadan, Mońǵolııadan kelgen ofıtserlerge jalpy taktıkadan sabaq bergen.
1973-75 jyldary Almaty joǵary áskerı komandalyq ýchılışesinde kafedra bastyǵy, 1975-1988 jyldary Almaty joǵary partııa mektebinde kafedra bastyǵy.
1988-91 jyldary B.Momyshuly atyndaǵy respýblıkalyq áskerı mektep-ınternattyń bastyǵy.
1992-1993 jyldary Memlekettik qorǵanys komıteti tóraǵasynyń keńesshisi.
QR Prezıdenti apparaty men Mınstrligi Kabıneti janynan qurylǵan Qorǵanys bóliminiń jetekshisi.
1994-1996 jyldary Mınstrligi Kabınetijanyndaǵy memlekettik attestatsııa komıtetinde arnaýly máseleler jónindegi bas sarapshy.
1996-1999 jyldary QR Parlamentiniń Májilis apparatynda qorǵanys jáne qaýipsizdik máseleler jónindegi keńesshi qyzmetin atqarǵan.
Áskerı qaıratker 180-ge jýyq ǵylymı eńbektiń avtory.
3-dárejeli «KSRO Qarýly kúshterinde Otanǵa qyzmet etkeni úshin» ordenimen, kóptegen medaldarmen marapattalǵan.
