Áskerı kafedranyń 300-den asa túlegi oqý-jattyǵý jıynyna tartyldy
ASTANA. KAZINFORM — Qazaqstan Qarýly kúshterinde azamattyq joǵary oqý oryndarynyń áskerı kafedralaryn támamdap, eki jyldyq qyzmetke shaqyrylǵan zapastaǵy ofıtserlermen oqý-jattyǵý jıyny ótip jatyr. Jalpy jıynǵa 309 ofıtser jumylǵan.
Qorǵanys mınıstrliginiń baspasóz qyzmeti habarlaǵandaı, «Ońtústik» óńirlik qolbasshylyǵynda 109 zapastaǵy ofıtser taktıkalyq daıarlyqtyń bazalyq kýrsynan ótti. Osyǵan oraı Taraz garnızonynyń Ofıtserler úıinde saltanatty jıyn uıymdastyrylyp, oǵan Qarýly kúshterdiń ardageri, ınternatsıonalıst-jaýynger, otstavkadaǵy general-maıor Álimjan Ernııazov qatysty.
Uıymdastyrýshylardyń aıtýynsha, bir aılyq qarqyndy daıyndyq barysynda tyńdaýshylar kásibı turǵyda edáýir shyńdalǵan. Áskerı qyzmetshiler «Aıbyn» taktıkasynyń bastapqy kýrsyn meńgerip, taktıkalyq, atys, ınjenerlik jáne tehnıkalyq daıyndyq, baılanysty uıymdastyrý, áskerı tehnıkany júrgizý, barlaý isi sekildi pánder boıynsha bilim aldy.
Zapastan áskerı qyzmetke shaqyrylǵan keıbir ofıtserler úshin qyzmettiń bastalýy tosyn jaǵdaı bolǵan joq.
— Maǵan ofıtser retinde eki jyldyq áskerı qyzmetke shaqyrylý — úlken jaýapkershilik. «Taktık» jıyny áskerı pánderdi tereń meńgerýge jáne tájirıbelik daǵdylardy jetildirýge múmkindik berdi. Sonymen qatar maıdanger atam, Keńes Odaǵynyń Batyry Raqymjan Toqataevtyń jolyn jalǵastyryp, áskerı áýlettiń dástúrin sabaqtastyrý men úshin zor mártebe, — dedi «Ońtústik» óńirlik qolbasshylyǵynyń 63563 áskerı bóliminde qyzmet etetin leıtenant Sanjar Turdálıev.
Qaraǵandy tehnıkalyq ýnıversıtetiniń túlegi leıtenant Erbolat Ómirbek te óz pikirin aıtty.
— Azamattyq mamandyǵym logıstıka jáne kólik salasyna baılanysty. 28349 áskerı bóliminde avtomobıl jáne saýytty tehnıka qyzmetiniń bastyǵy laýazymyna taǵaıyndaldym. Eki jyl ishinde kásibı ári ómirlik tájirıbe jınap, óz mamandyǵym boıynsha bilimimdi tereńdetemin dep otyrmyn, — dedi ol.
Almaty qalasyndaǵy 29219 áskerı bóliminde azyq-túlik, kıim-keshek, janar-jaǵarmaı qyzmetteri, tamaqtandyrý pýnktteri, monsha-kir jýý jáne kommýnaldyq-paıdalaný baǵyttary boıynsha 22 maman daıarlyqtan ótti. Jas leıtenanttar kúndelikti qyzmetti uıymdastyrý, qujat júrgizý tártibi jáne tyldyq qamtamasyz etý bólimsheleriniń jeke quramymen sabaq ótkizý ádistemesin meńgerdi.
Desanttyq-shabýyldaý áskerleriniń «Jaǵalaý» polıgonynda 26 ofıtser negizgi áskerı pánder boıynsha keshendi daıyndyqtan ótti. Baǵdarlamaǵa taktıkalyq, atys jáne dene daıarlyǵy, áskerı topografııa men bólimshelerdi basqarý sabaqtary kirdi.
Qazirgi ýaqytta zapastaǵy ofıtserler bazalyq daıyndyq kezeńin aıaqtap, mamandandyrý kýrstaryn oqyp jatyr. Oqý tolyq aıaqtalǵannan keıin olar taǵaıyndalǵan laýazymdaryna qaraı áskerı bólimderde qyzmettik mindetterin atqarýǵa kirisedi.
Osyǵan deıin Astanada «Aıbyn-2026» halyqaralyq jıynyna joldama alǵan komandalar anyqtalǵanyn jazdyq.
