Áskerı kafedralardyń 13 myńǵa jýyq kýrsanty Otanǵa adal bolýǵa ant berdi
ASTANA. KAZINFORM – Otan qorǵaýshy kúni qarsańynda elimizde alǵash ret joǵary jáne joǵary oqý ornynan keıingi bilim berý uıymdarynyń áskerı kafedra kýrsanttary Áskerı ant berdi.
Saltanatty is-sharalarǵa Qorǵanys mınıstrliginiń ókilderi, joǵary oqý oryndarynyń basshylary, kafedra oqytýshylary, Qarýly kúshterdiń ardagerleri, qadirli qonaqtar men ata-analar qatysty.
– Bıyl 2-6 mamyr aralyǵynda elimizdiń 80-nen astam joǵary oqý ornynda shamamen 13 myń stýdent áskerı ant berdi. Bul – elge qyzmet etý jolyndaǵy jaýapty qadamdy bildiretin shyn mánindegi aýqymdy ári mańyzdy oqıǵa. Biz úshin bilim berý ǵana emes, tózimdi, rýhty, jaýapkershiligi joǵary, Otandy qorǵaýǵa shynaıy daıyn jas býyndy tárbıeleý de mańyzdy, - dep atap ótti Qorǵanys mınıstrligi Áskerı bilim jáne ǵylym departamentiniń bastyǵy polkovnık Murat Oljabaev.
L.N. Gýmılev atyndaǵy Eýrazııa ulttyq ýnıversıtetinde 400-den astam stýdent óz halqyna, zańdy saılanǵan Prezıdentke adal bolýǵa jáne egemen Qazaqstannyń Konstıtýtsııasyn qasterleýge ant berdi.
– Otbasymyz úshin bul kún erekshe mańyzdy. Úlken ulym áskerı qyzmet jolyn tańdaǵan, al búgin inisi de osy baǵytta mańyzdy qadam jasap otyr. Budan sabaqtastyq pen áskerı mamandyqqa degen qurmetti kóremin. Uldarymdy maqtan tutamyn, - dedi L.N. Gýmılev atyndaǵy EUÝ áskerı kafedrasy túleginiń anasy Nursulý Serikbaeva.
Іs-sharaǵa qatysýshylar men qonaqtarǵa EUÝ-de otandyq áskerı tehnıkalar kórmesi uıymdastyryldy. Onda «Besqaru» zaýyty shyǵarǵan TAIMAS jáne AIBAR saýytty kólikteri tanystyryldy.
Budan bólek ALAN jaýyngerlik mashınalaryn qoldana otyryp, barlaý tobynyń taktıkalyq is-qımyldary, UQK Shekara qyzmeti Qurmet qaraýyly rotasynyń jáne Arnaıy operatsııalar kúshteri áskerı qyzmetshileriniń oryndaýynda qoıan-qoltyq urys elementteriniń qoıylymdary kórsetildi.
Endi «serjant» jáne «leıtenant» zapastaǵy áskerı ataqtaryn alǵan áskerı kafedra túlekterine kúshtik qurylymdarda ári qaraı qyzmet etý jáne kásibı damýǵa keń múmkindikter ashylady.
– Áskerı kafedrada «áskerı jýrnalıstıka» mamandyǵy boıynsha bilim aldym. Osy baǵytty tańdaý sebebim, áskerı qyzmet týraly aqparat taratý, forma kıgen jandar men olardyń adaldyǵy jaıynda aıtý mańyzdy dep sanaımyn, - dedi L.N. Gýmılev atyndaǵy EUÝ áskerı kafedrasynyń túlegi Aıdar Ahmet.
Munda alǵan bilim men mashyq túlekterdiń el qaýipsizdigin qamtamasyz etýge jáne qorǵanys qabiletin nyǵaıtýǵa úles qosatyn bilikti maman retinde qalyptasýyna negiz bolary anyq.
Buǵan deıin habarlaǵanymyzdaı, Qorǵanys mınıstrligi áskerı qyzmetshilerdiń tólem tártibin jańartty.
