Áskerı IT-mamandar daıarlaıtyn ınstıtýtqa qujat qabyldaý bastaldy
ASTANA. KAZINFORM – Almatydaǵy Radıoelektronıka jáne baılanys áskerı-ınjenerlik ınstıtýty jańa oqý jylyna talapkerlerdi qabyldaýdy bastady. Bıyl oqý ornyna 280-nen astam kýrsant qabyldaý josparlanyp otyr, dep habarlaıdy Qorǵanys mınıstrligi.
Mınıstrliktiń málimetinshe, qujat qabyldaý 31 shildege deıin jalǵasady. Talapkerler Ulttyq biryńǵaı testileý nátıjesi, psıhologııalyq testileý, medıtsınalyq tekserý, dene daıarlyǵy jáne arnaıy tekserýdi qamtıtyn kópsatyly irikteýden ótedi.
– Konkýrsqa qatysý úshin talapkerler UBT-nyń tórt páni boıynsha keminde 50 ball jınap, irikteýdiń barlyq kezeńinen sátti ótýi qajet. Bıyl ınstıtýtqa 280-nen astam kýrsant qabyldaý josparlanǵan, – delingen mınıstrlik habarlamasynda.
Instıtýt «Áskerı istegi radıoelektronıka jáne ınjınırıng», «Áskerı istegi radıotehnıka jáne ınjınırıng», «Áskerı istegi avtomattandyrý jáne ınfokommýnıkatsııalyq tehnologııalar» jáne «Aqparattyq qaýipsizdik júıeleri» mamandyqtary boıynsha ofıtserler daıarlaıdy. Bul baǵyttar tsıfrlyq áskerı basqarý júıelerin damytý, qorǵalǵan baılanys arnalary men kıberqaýipsizdikti qamtamasyz etýge arnalǵan.
Sonymen qatar ál-Farabı atyndaǵy Qazaq ulttyq ýnıversıtetimen birlesken «Áskerı jýrnalıstıka» jáne Qurmanǵazy atyndaǵy Qazaq ulttyq konservatorııasymen júzege asyrylatyn «Áskerı dırıjer» qosdıplomdy bilim berý baǵdarlamalaryna qabyldaý jalǵasyp jatyr. Bul mamandyqtarǵa túsýshiler shyǵarmashylyq emtıhan tapsyrady.
– Oqý tolyqtaı memleket esebinen qarjylandyrylady. Kýrsanttar tegin jatyn orynmen, tamaqpen, medıtsınalyq qyzmetpen jáne áskerı kıim-keshekpen qamtamasyz etiledi. Instıtýtty bitirgen túlekterge «leıtenant» alǵashqy ofıtserlik áskerı ataǵy beriledi, al úzdik támamdaǵandarǵa «aǵa leıtenant» áskerı ataǵy taǵaıyndalady. Sondaı-aq barlyq jas ofıtserler Qazaqstan Respýblıkasynyń Qarýly kúshteri men basqa da áskerı qurylymdarynda qyzmetpen qamtamasyz etiledi, – dep málimdedi Qorǵanys mınıstrligi.
Bıyl Radıoelektronıka jáne baılanys áskerı-ınjenerlik ınstıtýty qurylǵanyna 25 jyl tolyp otyr.
Aıta keteıik, Qurlyq áskeri áskerı ınstıtýtynda dron tehnologııasyn meńgergen mamandar daıarlanyp jatyr.
