Áskerı yntymaqtastyqtyń perspektıvasy talqylandy — mınıstrlik

ASTANA. KAZINFORM — Qazaqstan Qorǵanys mınıstri general-polkovnık Rýslan Jaqsylyqovtyń basshylyǵymen qazaqstandyq delegatsııa Italııanyń qorǵanys vedomstvosy men áskerı nysandaryn aralady.

Sapar aıasynda general-polkovnık Rýslan Jaqsylyqov Italııanyń Qorǵanys mınıstri Gvıdo Krozettomen kezdesti. Taraptar ekijaqty áskerı yntymaqtastyqtyń negizgi máselelerin, onyń ishinde áskerı bilim berý, jaýyngerlik daıyndyq jáne bitimgerlik qyzmetti talqylady.

General-polkovnık Rýslan Jaqsylyqov halyqaralyq arenada Qazaqstan úshin bitimgerlik qyzmettiń mańyzdylyǵyn atap ótti. Ol qazaqstandyq ofıtserlerdiń «BUU-nyń Lıvandaǵy ýaqytsha kúshteri» mıssııasyna, Italııa kontıngentiniń quramynda tabysty yntymaqtastyqtyń úlgisi retinde qatysýynyń mańyzdylyǵyn atap ótti.

Kelissózder Qazaqstan Respýblıkasynyń Ulttyq qorǵanys ýnıversıteti men Italııa Qarýly kúshteri Bas shtabynyń Joǵary qorǵanys zertteýleri ortalyǵy arasyndaǵy ózara is-qımyl úshin jańa múmkindikter ashatyn akademııalyq yntymaqtastyq jáne ǵylymı zertteýler týraly memorandým jasasýmen aıaqtaldy.

Sapar aıasynda delegatsııa sonymen qatar Pratıka-Dı-Mare teńiz avıabazasyna jáne ıtalıandyq áýe kúshteriniń áskerı áýejaıyna bardy. Munda eń iri ıtalıandyq «Leonardo» korporatsııasynyń ókilderi jaýyngerlik tikushaqtar men C4I áskerlerin basqarýdyń avtomattandyrylǵan júıesiniń jumys isteýin qamtamasyz etetin baǵdarlamalyq quraldardy kórsetti.

Qazaqstandyq delegatsııa Rımnen 119 shaqyrym jerde ornalasqan «Akýıla» taý daıyndyǵy bazasynda da boldy. Munda olar Italııa Qurlyq áskerleri Alpi polkiniń ınfraqurylymymen, jabdyqtarymen jáne áskerı qyzmetshilerdi oqytý baǵdarlamasymen tanysty.

Eske sala keteıik 17 myń áskerı qyzmetshige «kredıttik demalys» beriletini týraly jazǵan edik.