Áskerı ınstıtýttarda konkýrstyq irikteý júrip jatyr
ASTANA. KAZINFORM — Radıoelektronıka jáne baılanys áskerı-ınjenerlik ınstıtýtynyń, Saǵadat Nurmaǵambetov atyndaǵy Qurlyq áskerleri áskerı ınstıtýtynyń jáne Talǵat Bıgeldınov atyndaǵy Áýe qorǵanysy kúshteri áskerı ınstıtýtynyń qabyldaý komıssııalary úmitkerlerdi konkýrstyq irikteýdi uıymdastyrýdy jáne ótkizýdi iske asyrady.
Barlyq joǵary áskerı oqý oryndarynda kásibı-psıhologııalyq irikteý ótkizildi. Úmitkerler medıtsınalyq kýálandyrýdan ótip, dene shynyqtyrý deńgeıi tekseriledi. Jekelegen mamandyqtar boıynsha úmitkerler túsý emtıhandaryn tapsyrady.
Búgingi tańda Radıoelektronıka jáne baılanys áskerı-ınjenerlik ınstıtýtyna 400 úmitker qujat tapsyrdy. Konkýrstyq irikteý 6 mamandyq jáne 12 biliktilik boıynsha júrgiziledi. «Aqparatty qorǵaýdy uıymdastyrý jáne tehnologııasy» jáne «radıoelektrondyq barlaý men radıoelektrondyq kúresti uıymdastyrý» mamandyqtary úlken qyzyǵýshylyq týdyryp otyr.
Sonymen qatar, JOO-da «Áskerı jýrnalıstıka» jáne «Áskerı dırıjerleý» baǵyttary boıynsha irikteý júrgizilýde. Áskerı jýrnalısterdi daıarlaý ál-Farabı atyndaǵy Qazaq ulttyq ýnıversıtetimen, al áskerı dırıjerlerdi Qurmanǵazy atyndaǵy Qazaq ulttyq konservatorııasymen birlesip qos dıplomdyq bilim berý formatynda júzege asyrylatyn bolady.
Áýe qorǵanysy kúshteriniń áskerı ınstıtýty 8 mamandyq jáne 16 biliktilik boıynsha qabyldaýdy júzege asyrady. Qabyldaý komıssııasyna barlyǵy 525 ótinish kelip tústi. Olardyń basym bóligi «áskerı ushqysh» jáne «áskerı medıtsına» mamandyqtaryna tapsyrǵan. Budan bólek alǵash ret «avıatsııany tyldyq qamtamasyz etý» jáne «áýeaılaqtyq-tehnıkalyq qamtamasyz etý» mamandyqtary boıynsha qabyldaý ashyldy.
Marat Ospanov atyndaǵy Batys Qazaqstan medıtsınalyq ýnıversıtetimen birlesip áskerı bilim oryndary qos dıplomdy bilim berý formatynda áskerı-medıtsınalyq baǵyt boıynsha mamandar daıarlaýdy júzege asyrady. Sol qaǵıda boıynsha bolashaq Áskerı-teńiz kúshteriniń ofıtserleri de daıyndalady. Alǵashqy eki jylda «korabl shtýrmany» jáne «dızeldi energetıkalyq qondyrǵylar ınjeneri» mamandyǵyn alǵan kýrsanttar Áýe qorǵanysy kúshteri áskerı ınstıtýtynyń bazasynda oqýdan ótedi, úshinshi jáne tórtinshi kýrstarda Shahmardan Esenov atyndaǵy Kaspıı tehnologııalar jáne ınjınırıng ýnıversıtetinde (Aqtaý q.) oqýyn jalǵastyrady.
Úmitkerler arasynda UBT-dan joǵary – 100-den astam ball jınaǵan talapkerler de bar. Oqýǵa túsýshiler arasynda 20-dan astam merzimdi qyzmettegi áskerı qyzmetshiler bar ekenin atap ótken jón. Máselen, Mırjan Sultanov «Sarbaz 2.0» baǵdarlamasy boıynsha bilim grantyn alyp, «áskerı ushqysh» mamandyǵyna túsýdi josparlap otyr.
Qurlyq áskerleriniń bilim ordasynda bıylǵy jyly qabyldaý 17 áskerı mamandyq boıynsha júzege asyrylady. Talapkerler arasynda motoatqyshtar, tank jáne artıllerııa bólimshelerin basqarý mamandyqtaryna qyzyǵýshylyq joǵary bolyp tur. Injenerlik jáne tehnıkalyq beıindegi mamandyqtarǵa túsýde de joǵary konkýrs bolatyny anyq.
Áskerı joǵary oqý oryndarynyń qabyldaý komıssııalary jumysyn shtattyq rejımde jalǵastyrýda. Konkýrstyq irikteýdiń barlyq kezeńderinen sátti ótken kandıdattar mandattyq komıssııalardyń sheshimi boıynsha kýrsanttar qataryna qabyldanatyn bolady. Jastardyń áskerı bilimge degen qyzyǵýshylyǵynyń artýy áskerı qyzmettiń bedeliniń ósip kele jatqanyn dáleldeıdi jáne QR Qarýly kúshteriniń kadrlyq áleýetin nyǵaıtýǵa yqpal etedi.
Aıta ketelik qazaqstandyq áskerı qyzmetshilerge shetelde oqý kezinde áýe bıletteriniń aqysy memleket esebinen tólenetini týraly jazǵan edik.
