Áskerı ınstıtýtta ushqyshsyz ushý apparat mamandaryn daıarlaıtyn mektep ashyldy
ASTANA. KAZINFORM — Saǵadat Nurmaǵambetov atyndaǵy Qurlyq áskerleri áskerı ınstıtýtyn aıaqtaǵaly jatqan 300-den astam kýrsant FPV-drondaryn meńgerýge kiristi. Osy maqsatta oqý ornynda ushqyshsyz ushý mamandaryn daıarlaıtyn áskerı mektep ashyldy. Bul týraly Qorǵanys mınıstrligi málim etti.
Endi áskerı ınstıtýt kýrsanttary mekteptiń tájirıbeli oqytýshylarynyń jetekshiligimen búginde soǵys áreketteriniń sıpatyn aıtarlyqtaı ózgertken ushý apparattaryn basqarýdy meńgere alady.
Bolashaq ofıtserler keshenderdiń sıpattamalaryn, qurylysyn, qoldaný erejelerin, tehnıkalyq qyzmet kórsetý tártibin, sondaı-aq, qaýipsizdik sharalary men ártúrli jaǵdaıda qoldaný erekshelikterin úırenedi.
– Qazirgi zaman tehnologııalaryn meńgerý arqyly kýrsanttar búgingi kúni kóptegen salada keńinen qoldanylatyn ushý apparattarymen jumys isteýge praktıkalyq turǵyda daǵdylanady, – dedi áskerı mekteptiń bastyǵy podpolkovnık Danııar Dildabaev.
Sonymen birge kompıýterlik sımýlıatorlardaǵy sabaqtarǵa da erekshe kóńil bólinbek. Onda kýrsanttar ushý tapsyrmalaryn oryndaıdy, tótenshe jaǵdaıda tehnıka men jeke quramǵa qaýip tóndirmeı áreket etýge mashyqtanady.
Praktıkalyq daıyndyq jergilikti jerdegi naqty ushýlardy, kedergiler arasynda manevr jasaýdy, baqylaý júrgizýdi jáne basqa da oqý tapsyrmalaryn qamtıdy. Mektepte FPV-drondarǵa arnaıy dron-trassa salynǵan. Onda aldaǵy ýaqytta kýrsanttar arasynda jarys ótkizý josparda bar.
Taǵy bir aıta ketetini, mekteptiń nusqaýshylary drondardyń bárin, shaǵyn FPV-den bastap ortasha ólshemdi «kamıkadze» drondarǵa deıin, bólshekterinen ózderi jınaıdy. Kýrsanttarǵa da sol daǵdyny úıretýdi josparlap otyr.
Qazirgi tańda 300-den asa oqýdy aıaqtaýshy kýrsant fakýltatıv túrindegi oqytýdy meńgerýde. Kelesi oqý jylynan bastap ushqyshsyz ushý apparattaryn meńgerýdi qalaǵandardyń bári oqı alady.
Ushqyshsyz avıatsııalyq júıe mamandaryn daıarlaý Qarýly kúshterdi qazirgi zamanǵy tehnologııalardy qaýipsizdik pen el qorǵanysy múddesine tıimdi paıdalana alatyn joǵary bilikti kadrlarmen qamtamasyz etýge baǵyttalǵan.
Eske sala keteıik, áskerı tamaqtyń quny men kalorııasy artty.