Áskerı ınstıtýt kýrsanttary qarý atýdan emtıhan tapsyrdy
Oqý atystary Almaty mańyndaǵy ınstıtýttyń polıgonynda júzege asyryldy. Osylaısha bolashaq tank mamandary negizgi áskerı pán boıynsha synaq tapsyrdy, dep habarlady QR Qorǵanys mınıstrliginiń baspasóz qyzmetinen.
Atys daıyndyǵy Qurlyq áskerleri Áskerı ınstıtýty kýrsanttarynyń dala tósinde kásibıligin arttyratyn negizgi pánderiniń quramdas bóligi bolyp sanalady. Munda bolashaq ofıtserler atý sheberligine mashyqtanady ári alystan jyldam kózdeýdi úırenedi.
Atys sabaqtary kezinde kýrsanttardyń teorııalyq túrde alǵan bilimderi tájirıbe júzine ushtasyp, olardyń jaýyngerlik daǵdylaryn arttyrady. Joǵary atys sheberligi kýrsanttardyń kásibı daıarlyǵy men bólimshelerdiń jaýyngerlik jattyǵýlary kezinde jetildirile túsedi.
Shtattyq oq atý barysynda bolashaq ofıtserler mol tájirıbe jınaqtap, jeke qarý-jaraqtan atýdyń ádis-tásilderin jáne atysty durys basqarýdy uıymdastyrýdy úırendi. Sonymen birge atysty ótkizý kýrsanttar úshin ózindik psıhologııalyq kemeldený emtıhany boldy.
Kýrsanttardyń tankten shtattyq artıllerııalyq oq atý sharalaryn ótkizýi kýrsanttardyń alǵan teorııalyq biliminiń sapasyn, sonymen birge jeke quramnyń oqý bitirý emtıhandaryn tapsyrýynyń jalpy deńgeıin tekserýge múmkindik berdi.