Áskerı gospıtalde úsh mańyzdy ýrologııalyq ota jasaldy
ASTANA. KAZINFORM – Operatsııalar QR Qorǵanys mınıstrliginiń Bas áskerı klınıkalyq gospıtalinde jasalyp, YouTube platformasynda onlaın rejımde kórsetildi. Bul týraly Qorǵanys mınıstrliginiń baspasóz qyzmeti málimdedi.
Otanyń barysyn Qazaqstannyń ár óńirinen, taıaý shet elderden kelgen dárigerler, sondaı-aq «Astana» medıtsına ýnıversıtetiniń stýdentteri baqylap otyrdy. Onlaın-konferentsııaǵa qatysýshylar operatsııalar protsesimen egjeı-tegjeıli tanysýǵa, suraqtar qoıýǵa jáne oǵan tikeleı efır arqyly jaýap alýǵa múmkindigi boldy.
Lazerlik jabdyqty qoldana otyryp, joǵary mamandandyrylǵan ýrologııalyq operatsııany medıtsına ǵylymdarynyń kandıdaty, S. P. Botkın atyndaǵy Máskeý qalalyq klınıkalyq aýrýhanasynyń joǵary sanatty ýrolog dárigeri Roman Andreev jasady. Ota jasaý úshin reseılik hırýrg ózimen birge Qazaqstanda balamasy joq ıtalıandyq lazerlik apparat keshenin alyp keldi. Dárigerdiń tájirıbesindegi eń jasy úlken patsıent 103 jastaǵy qarııa ekenin atap ótti. Al búgingi patsıent nebári 70-te.
— Naýqasqa qýyq asty beziniń qatersiz adenomasyna operatsııa jasaldy. Uıymdastyrýshylar tájirıbe almasý úshin barlyq jaǵdaı jasaýǵa tyrysty. Biz keń spektrde qoldanylatyn ıtalıandyq lazerlik jabdyqtyń jumysyn kórsettik. Buny neırohırýrgııada, hırýrgııada jáne gınekologııada qoldanýǵa bolady, — dep túsindirdi Roman Andreev.
Laparoskopııalyq plastıka boıynsha ekinshi operatsııany joǵary sanatty ýrolog-dáriger, Ulttyq ǵylymı medıtsınalyq ortalyǵy ýrologııa bóliminiń aǵa ordınatory Rýstam Omarbaev jasady.
Úshinshisin retrogradtyq ıntrarenaldy hırýrgııa boıynsha áskerı gospıtal ýrologııa bóliminiń bastyǵy medıtsına qyzmetiniń podpolkovnıgi Dastan Kenjerahmanov basqardy.
«Bul turǵyda onyń biraz tájirıbesi bar. Ótken jyldyń jazynda Qazaqstanda alǵash ret áskerı hırýrg ýrolıtıazben aýyratyn naýqastyń eki búıreginen birden tastardy alyp tastaý úshin kúrdeli operatsııa jasady. Sol kezde búkil medıtsınalyq protsedýra da onlaın rejıminde kórsetilgen», — delingen habarlamada.
Bas áskerı klınıkalyq gospıtal bastyǵy medıtsınalyq qyzmet polkovnıgi Ǵabıden Aıdarov atap ótkendeı, forýmnyń negizgi maqsaty — ýrologııa jáne andrologııa salasyndaǵy jańa tehnologııalarmen Qazaqstannyń ártúrli óńirleri men taıaý shet elderdiń jas jáne tájirıbeli dárigerlerimen tájirıbe almasý.
— Konferentsııa ótkizý — ýrologııany damytýdaǵy mańyzdy qadam. Ol ǵylym men praktıka arasyndaǵy baılanysty qoldaýǵa baǵyttalǵan, bul, sózsiz, ǵylymı medıtsınalyq zertteýler protsesin jaqsartýǵa úles qosady jáne mamandardy odan ári jemisti jumys isteýge yntalandyrady, — dedi G. Aıdarov.
Óz pikirimen «Astana medıtsına ýnıversıteti» KEAQ ýrologııa jáne andrologııa kafedrasynyń meńgerýshisi, medıtsına ǵylymdarynyń kandıdaty, qaýymdastyrylǵan professor Ulanbek Jańbyrbekuly da bólisti. Bıyl 60 jyldyǵyn atap ótetin ýnıversıtet áskerı gospıtalmen tyǵyz baılanysta jumys isteıtinin atap ótti.
— Búgingi master-klass ýrologııadaǵy jańa tehnologııalarǵa negizdelgen. Bizge joǵary qýatty lazer ákelindi, onyń kómegimen qýyq asty beziniń adenomasy qan shyǵarýsyz joıylady. Bul apparattyń artyqshylyǵy sol, patsıentter qysqa merzimde qalpyna kelip, 2–3 táýlikke statsıonardan shyǵarylady, — dep naqtylady U. Jańbyrbekuly.
Atalmysh shara «Ýrologııadaǵy zamanaýı lazerlik tehnologııalar» taqyryby boıynsha mamandardyń pikir almasýymen aıaqtaldy.
