Áskerı dıplomattar Qytaıda qaza tapqan qazaqstandyq jaýyngerlerdiń rýhyna taǵzym etti
ASTANA. KAZINFORM – Qytaı Halyq Respýblıkasynyń Hebeı provıntsııasyndaǵy Chjantszıakoý qalasyna qarasty Chjanbeı ýezinde Ekinshi dúnıejúzilik soǵysynda qol jetkizilgen jeńistiń 81 jyldyǵyna arnalǵan keńes jáne mońǵol jaýyngerlerine arnalǵan eskertkishke gúl shoqtaryn qoıý rásimi ótkizildi.
Qazaqstan atynan bul is-sharaǵa Qytaı Halyq Respýblıkasyndaǵy Qazaqstan Respýblıkasy Elshiliginiń qorǵanys máseleleri jónindegi attashesi general-leıtenant Marat Qusaıynov bastaǵan delegatsııa qatysty.
Saltanatty rásimge Armenııa, Ázerbaıjan, Belarýs, Qyrǵyzstan, Mońǵolııa, Reseı, Tájikstan, Túrkimenstan jáne Ózbekstan elderiniń dıplomatııalyq mıssııa basshylary, sondaı-aq ShYU Hatshylyǵynyń, Chjantszıakoý qalasy men Chjanbeı ýeziniń halyq úkimetteriniń basshylyǵy qatysty.
Eske alý sharasyna qatysýshylar bir mınýt únsizdikpen qaza tapqandardyń rýhyna taǵzym etip, memorıaldyq keshenge gúl shoqtaryn qoıdy.
Jaýyngerler qaza tapqan jerge eskertkish alǵash ret 1945 jyly ornatylyp, 1957 jyly memorıal ashyldy. Obelıskke 53 keńestik jáne 13 mońǵol áskerı qyzmetshiniń esimi jazylǵan.
Onyń ishinde resmı málimetterge sáıkes, bul memorıaldyq keshende Qazaq KSR aýmaǵynan shaqyrylǵan nemese sol jerdiń týmasy bolyp tabylatyn 21 jaýyngerdiń esimi anyqtalǵan.
Dıplomatııalyq mıssııa ókilderi memorıaldyq mýzeıdiń tarıhı jádigerlerimen tanysqan soń qurmetti qonaqtar kitabyna jazba qaldyrdy.
Eske sala keteıik, budan buryn Qyzylorda oblysynda qart maıdangerge qurmet kórsetilgenin jazǵanbyz.
