Áskerı daıyndyq pániniń ataýy ózgerip, mazmuny jańarady
ASTANA. KAZINFORM – Qazaqstanda mektepterde oqytylatyn áskerı daıyndyq pániniń ataýy ózgerip, oqý mazmuny jańartylady. Bul týraly QR Oqý-aǵartý vıtse-mınıstri Shynar Aqparova Májiliste málim etti.
Vıtse-mınıstrdiń aıtýynsha, qazirgi tańda pán ataýyn «Alǵashqy áskerı daıyndyq» dep ózgertýge qatysty túzetýler ázirlenip jatyr. Tıisti buıryq jobasy Ádilet mınıstrliginiń qaraýynda bolady.
– Qujat qabyldanǵannan keıin oqý baǵdarlamalary men josparlary qaıta qaralady. Oqýlyqtar jańartylyp, saraptamadan jáne aprobatsııadan ótedi. Bul jumystardy tolyq iske asyrýǵa shamamen 1,5 jyl ýaqyt qajet, - dedi ol.
Osyǵan sáıkes pán 2028–2029 oqý jylynan bastap jańa ataýmen oqytylady.
Vıtse-mınıstr áskerı daıyndyq pániniń qazirgi jaı-kúıine toqtaldy.
– Búginde elimizdegi 6 myńǵa jýyq mektep pen 700-den astam kolledjde «Alǵashqy áskerı-tehnologııalyq daıyndyq» páni oqytylady. Pán boıynsha 98 saǵat oqý júktemesi qarastyrylǵan, - dedi Shynar Aqparova.
Onyń aıtýynsha, oqý-dala jıyndaryn uıymdastyrýda óńirler arasynda aıyrmashylyq bar.
– Jıyndardy áskerı bólimder bazasynda ótkizý mańyzdy. Alaıda bul jumys barlyq óńirde birdeı deńgeıde júrgizilmeıdi. Buǵan qarjylandyrýdyń jetkiliksizdigi, áskerı bólimderdiń jetispeýi jáne ınfraqurylymnyń daıyn bolmaýy áser etip otyr, - dedi vıtse-mınıstr.
Aıta keteıik, buǵan deıin Memleket basshysy áskerı-patrıottyq tárbıe júıesin jetildirýge baǵyttalǵan zańǵa qol qoıǵan bolatyn.
