Áskerı daıyndyq muǵalimderi úshin kýrstar nege qoljetimsiz
ASTANA. KAZINFORM — Qazaqstanda áskerı daıyndyq páni muǵalimderiniń biliktiligin arttyrý júıesinde talaptardyń tolyq saqtalmaýy jáne kýrstardyń qoljetimdiligine qatysty másele bar. Bul týraly QR Oqý-aǵartý vıtse-mınıstri Shynar Aqparova málimdedi.
Vıtse-mınıstrdiń aıtýynsha, biliktilikti arttyrý Qazaqstan Respýblıkasy Oqý-aǵartý mınıstrliginiń № 175 jáne № 95 buıryqtaryna sáıkes júrgizilýi tıis. Alaıda bul talaptardyń tolyq kólemde saqtalmaýy baıqalady.
— Kýrstardy ótkizetin uıymdar belgilengen talaptarǵa saı bolýy kerek. Sonymen qatar bilim berý baǵdarlamalary Oqý-aǵartý mınıstrligi tarapynan mindetti saraptamadan ótýi tıis. Biraq bul talaptar barlyq jaǵdaıda birdeı saqtalyp otyrǵan joq, — dedi ol.
Sonymen qatar, biliktilikti arttyrý kýrstaryn uıymdastyrý barysynda da táýekelder bar.
— Qorǵanys mınıstriniń 2025 jylǵy 7 tamyzdaǵy № 997 buıryǵyna sáıkes, biliktilikti arttyrý kýrstary bir ǵana uıym — «Áskerı-strategııalyq zertteýler ortalyǵy» AQ arqyly aqyly negizde ótkizilip jatyr. Kýrstyń quny 57 myń teńgeni quraıdy, — dedi Shynar Aqparova.
Onyń sózinshe, bul kóptegen pedagog úshin qoljetimsiz.
— Bul jaǵdaı pedagogterdiń biliktiligin arttyrý múmkindigin shekteıdi, — dedi vıtse-mınıstr.
Sonymen birge bul másele zańnamalyq turǵyda retteýdi qajet etedi.
— «Pedagog mártebesi týraly» zańǵa sáıkes pedagogterdiń biliktiligin arttyrý qamtamasyz etilýi tıis. Al «Bilim týraly» zańǵa sáıkes, bul mindet bilim berý uıymdarynyń quzyretine jatady. Sondyqtan bul baǵyttaǵy máselelerdi júıeli túrde sheshý qajet, — dedi ol.
Aıta keteıik, buǵan deıin áskerı daıyndyq pánin oqytý júıesin jetildirý máselesi kóterilgen edi.
