Áskerı dárigerlerge qurmet kórsetildi

NUR-SULTAN. QazAqparat – Elordadaǵy Qarýly kúshterdiń Ulttyq áskerı-patrıottyq ortalyǵynda medıtsına qyzmetkerleri kúnine arnalǵan saltanatty shara ótti, dep habarlaıdy QazAqparat Qorǵanys mınıstrliginiń baspasóz qyzmetine silteme jasap.

Qorǵanys mınıstriniń orynbasary general-maıor Muhamedjan Talasov Qarýly kúshter Bas áskerı-medıtsınalyq basqarmasy jáne áskerı medıtsınalyq mekemelerdiń jeke quramymen kezdesti. Ol dárigerlerdi, orta jáne kishi medıtsınalyq qyzmetkerlerdi, áskerı-medıtsınalyq qyzmet ardagerlerin kásibı merekemen quttyqtady.

«Ult densaýlyǵy – elimizdegi memlekettik saıasattyń basty basymdyqtarynyń biri. Azamattardyń densaýlyǵyna qamqorlyq tanytatyn maman ıeleri qaı ýaqytta bolmasyn qoǵam arasynda qurmetke ıe boldy. Sizder koronavırýs pandemııasy kezinde naýqastardyń ómiri men densaýlyǵy úshin aıanbaı kúrestińizder. Búgingi kúni de sizder joǵary jaýapkershilik pen jumystaryńyzǵa degen adaldyqty tanytyp, kásibı paryzdaryńyzdy abyroımen atqaryp kelesizder», - dedi general-maıor Muhamedjan Talasov.

Sonymen qatar, áskerı-medıtsınalyq qyzmettiń órkendeýi men qalyptasýyna eleýli úles qosqan otandyq áskerı medıtsına ardagerlerine erekshe rızashylyǵyn bildirdi. Olar qalyptastyrǵan tájirıbe men bilimdegi dástúrler qazirgi ýaqytta alda turǵan aýqymdy mindetterdi sheshýge septigin tıgizetinin aıtty.

Saltanatty sharada kóp jylǵy jemisti eńbegi jáne densaýlyq saqtaý júıesin jetildirýge qosqan belsendi úlesi úshin birqatar áskerı medıtsına qyzmetkerine medaldar, estelik belgiler, qurmet gramotalary men alǵys hattar tabystaldy.