Áskerı boryshyn ótep júrgen jastar mamandyqqa oqytylady – mınıstrlik
Memleket Basshysy Qasym-Jomart Toqaev «Halyq birligi jáne júıeli reformalar – el órkendeýiniń berik negizi» atty Qazaqstan halqyna Joldaýynda «Tegin tehnıkalyq jáne kásiptik bilim berý» jobasyn iske asyrýdy jalǵastyrý qajettigin atap ótti.
Prezıdent kásibı baǵdar berý jáne jastardy oqytý júıesindegi Qarýly Kúshterdiń róline jeke toqtaldy: «Mamandyq alýdyń taǵy bir múmkindigi armııada berilýi tıis. Merzimdi qyzmettegi sarbazdardyń ekonomıkadaǵy naqty sektor úshin qajetti jumysshy mamandyǵyn ıgerý máselesin pysyqtaǵan jón».
«Qorǵanys mınıstrligi búginde eńbek naryǵynda suranysqa ıe merzimdi qyzmettegi áskerı qyzmetshilerdiń mamandyqtaryna monıtorıng júrgizýde. Onyń nátıjeleri boıynsha jumysshy mamandyqtary boıynsha daıarlaý uıymdastyrylady. Jastar áskerde boryshyn ótep júrgen kezde otandyq naryqta tapshy qajetti bilimdi, daǵdylar men mamandyqtardy tegin alady.
Sarbazdarǵa Qurlyq áskerleriniń, Áýe qorǵanysy kúshteriniń, Baılanys departamentteriniń, Radıatsııalyq, hımııalyq, bıologııalyq qorǵaý jáne ekologııalyq qaýipsizdik áskerleriniń kishi mamandaryn daıyndaıtyn oqý-jattyǵý ortalyqtarynda kásibı bilim beriletin bolady», - delingen mınıstrlik habarlamasynda.
Málim etilgendeı, merzimdi áskerı qyzmetshiler qos maqsattaǵy áskerı mamandyqtardy meńgeredi. Onyń ishinde aýyr júk mashınalarynyń júrgizýshileri, ekskavatorshylar, traktorshylar, jol tósegishter, dızelıster – elektrıkter, baılanys mamandary jáne taǵy basqalar bar.
«Alǵan mamandyǵy jastarǵa áskerden keıingi ómirde de kádege jarary anyq.
Qurlyq áskerleriniń oqý-jattyǵý ortalyǵynda qazirdiń ózinde júk kólikteriniń júrgizýshilerin daıarlaýǵa arnalǵan oqý rotasy quryldy. Jyl saıyn munda eńbek naryǵynda suranysqa ıe mamandyqtar boıynsha 160-qa jýyq maman daıarlaý josparlanyp otyr. Sabaqtar aldaǵy jyly bastalady», - dedi mınıstrlikten.
