Áskerı boryshyn ótegender JOO-larǵa qandaı qujattar tapsyrýy kerek

ASTANA. QazAqparat – QR Qorǵanys mınıstriniń keńesshisi Aıgúl Tólembaeva merzimdi áskerı qyzmetin ótkergen jastarǵa joǵary oqý ornyna jeńildetilgen tártippen túsýi úshin qandaı qujattardy tapsyrýy kerek ekenin aıtty, dep habarlaıdy QazAqparat tilshisi.

Aıta keteıik, QR Qarýly kúshteriniń quralymdary qatarynda merzimdi áskerı qyzmetin ótkergen azamattar úshin JOO-ǵa túsýdiń jeńildikteri qarastyrylǵan.

«Bul jeńildikterdi paıdalaný úshin jastar tıisti qujattardy joǵary oqý oryndaryna tapsyrý kerek. Onyń arasynda áskerı qyzmetti ótkergeni týraly anyqtamany usyný tıis. Bul qujatty halyqqa qyzmet kórsetý ortalyǵynda alýǵa bolady», - dedi A. Tólembaeva Ortalyq kommýnıkatsııalar qyzmetindegi baspasóz máslıhatynda.

Sonymen qatar, jastar áskerı bılet pen jeke kýáliktiń, bilimi týraly qujattyń kóshirmesin, 086 anyqtamasyn tapsyrýy tıis.

Budan buryn habarlanǵandaı, qyzmet aıaqtalǵannan keıin UBT-ny eskermesten eki jyl ishinde aqyly negizde JOO-ǵa oqýǵa túsý múmkindigi bar.

Ekinshiden, jaýyngerlik daıarlyqta, júktelgen mindetterdi oryndaýda joǵary nátıjelerge qol jetkizgen jáne úlgili áskerı tártibimen erekshelengen áskerı qyzmetshilerge UBT tapsyrmaı-aq, JOO esebinen oqý quqyǵy beriledi.

Budan ózge, oqý ornynyń áskerı kafedrasynda emtıhansyz tegin oqýǵa bolady.

Atap aıtqanda, merzimdi áskerı qyzmetin ótep shyqqandar qatardaǵy jaýynger bolady.

Al eger ofıtser shenin alǵysy kelse, olar áskerı kafedrada bilim alyp, leıtenant atanady